Тавзеҳи самтҳои Паёми Пешвои миллат ба Парлумон дар «Академияи ВАО-и Тоҷикистон»

ДУШАНБЕ, 02.02.2018 /АМИТ «Ховар»/. Имрӯз дар  Муассисаи  давлатии  «Академияи ВАО-и Тоҷикистон» дар мавзӯи «Тавзеҳи нуктаҳои асосии Паёми Президенти Ҷумҳурии Тоҷикистон ба Маҷлиси Олии мамлакат ва инъикоси он дар воситаҳои ахбори умум» ҳамоиш  доир гардид.

Дар он раисони кумитаҳои Маҷлиси намояндагони Маҷлиси Олии Ҷумҳурии Тоҷикистон Шариф Раҳимзода ва Лутфия Раҷабова оид ба Паёми Президенти Ҷумҳурии Тоҷикистон Эмомалӣ Раҳмон ба Маҷлиси Олии Ҷумҳурии Тоҷикистон сухан гуфтанд. Таъкид гардид, ки Паёми Сарвари давлат бозгӯи вазъи воқеии ҷумҳурӣ буда, он самтҳои асосии фаъолиятро дар бахши сиёсати дохилӣ ва хориҷии мамлакат равшан ифода мекунад.

Тавре директори Муассисаи давлатии «Академияи ВАО-и Тоҷикистон» Зинатуллоҳ Исмоилзода изҳор дошт, баргузории ҳамоиши мазкур ба хотири инъикоси ҳамаҷонибаи Паёми Пешвои миллат буда, намояндагони воситаҳои ахбори омма ва донишҷўёни бахшҳои журналистии донишгоҳҳои мамлакат ба саволҳои сершумори худ аз вакилони мардумӣ посухи мушаххас пайдо карданд.

Дар анҷоми ҳамоиш ба 40 нафар хатмкунандагони машғулиятҳои омӯзишӣ шаҳодатномаҳои Муассисаи давлатии «Академияи ВАО» супорида шуд.

Ёдовар мешавем, ки «Академияи ВАО-и Тоҷикистон» аз 1 марти соли 2016 фаъолияти худро оғоз намуда, ба такмили ихтисоси кормандони соҳаи ВАО машғул аст.