Дар хоҷагиҳои кишоварзии вилояти Суғд кишти баҳорӣ вусъат меёбад

ХУҶАНД, 04.04.2018. /АМИТ «Ховар»/.  Имрӯзҳо дар хоҷагиҳои кишоварзии ноҳияҳои вилояти Суғд чун дар дигар минтақаҳои ҷумҳурӣ корҳои саҳроӣ, аз ҷумла, кишти баҳорӣ бо суръат идома дорад.

Тавре ба АМИТ «Ховар» мудири шуъбаи растанипарварии сарраёсати кишоварзии вилоят Абдуазиз Маҳмудов иттилоъ дод, соли равон кишоварзони вилоят азм доранд, ки кишти баҳорӣ, бахусус кишти пунбадонаро бо риояи қоидаҳои агротехникӣ сари вақт гузаронида,  ҳосили фаровон ба даст оранд.

Ҳоло дар ҳамаи хоҷагиҳои деҳқонӣ деҳқонон ба кишти зироати баҳорӣ, аз ҷумла, пунбадона шурӯъ намудаанд.

То 3 апрел дар майдони 59 036 га корҳои кишти баҳорӣ анҷом ёфта, кишти бештар дар ноҳияҳои Деваштич, Зафаробод, Мастчоҳ, Б.Ғафуров, Истаравшан, Панҷакент ва Спитамен гузаронида шудааст. Дар ин самт аз 14 ноҳияи кишоварзӣ  корҳо бештар  дар ноҳияҳои Деваштич, Истаравшан ва Шаҳристон хуб ба роҳ монда шудаанд.

Ҳамчунин масъулини ноҳияҳои Ашт, Б.Ғафуров, Зафаробод, Исфара, Конибодом, Кӯҳистони Мастчоҳ, Спитамен ва Мастчоҳро, ки беш аз нисф ками нақшаи корҳоро иҷро кардаанд, мебояд дар ин самт бо истифода аз боду ҳавои мусоид ҷараёни корҳоро ҷоннок намоянд.

Дар маҷмӯъ, соли равон кишоварзони вилоят нақша доранд дар майдони 182 ҳазору 975 гектар кишти баҳорӣ анҷом диҳанд, ки аз он 57 ҳазорашро кишти пахта ташкил медиҳад. Ҳоло дар самти кишти пунбадона аз 7 ноҳияи пахтакор дар ноҳияҳои Конибодом ва Мастчоҳ  корҳо хуб ҷараён доранд.