Корҳои таъмиру барқарорсозӣ дар нахустин маркази илмию таълимӣ барои занону духтарон дар Тоҷикистон бо суръат идома доранд

Апрель 30, 2018 10:19

ДУШАНБЕ, 30.04.2018. /АМИТ «Ховар»/. Бо мақсади ҳифзу нигоҳдошти мероси ниёгон ва рушди соҳаи сайёҳӣ ёдгории «Мадрасаи Оим», воқеъ дар шаҳри Конибодом мавриди таъмиру тармим қарор дорад. Таъмир ва барқарорсозии ин иншооти нодири фарҳангӣ ва қадимаи Осиёи Марказӣ бо ташаббуси Мақомоти иҷроияи ҳокимияти давлатии шаҳри Конибодом тавассути маблағгузории Сафоратхонаи ИМА роҳандозӣ гардидааст. То имрӯз боми мадраса ва ҳуҷраҳо аз таъмир бароварда шуда, таъмири ду масҷиди дохили мадраса ва саҳни ҳавлии он ҷараён дорад.

«Мадрасаи Оим» ёдгории таърихию меъмории асри 19 буда,  дар сари роҳи қадимаи Конибодом-Қӯқанд самти роҳи Патар воқеъ аст. Аз рӯи маълумот, бинои мадраса соли 1825 аз ҷониби яке аз шогирдони мадраса Қорӣ Исмати Ҷамол мавриди истифода қарор дода шудааст. Мадрасаро Мулло Миролим ном донишманде сохта, ба номи духтараш Бибӣ Оим гузоштааст.

Тавре масъулини мақомоти шаҳр иброз намуданд, «Мадрасаи Оим» ёдгории таърихию меъмории асри 19 буда, солҳои 90-уми асри гузашта таъмир гардида буд. Таъмир ва барқарорсозии ин иншооти нодири фарҳангӣ дар доираи лоиҳаи «Ҳифз ва нигоҳдории Мадрасаи Оим» роҳандозӣ гардидааст. Татбиқи лоиҳа моҳи сентябри соли 2017 оғоз гашта, феврали соли 2019 ба итмом хоҳад расид. Айни замон корҳои таъмиру барқарорсозии иншооти мазкур бовусъат идома доранд.

Ёдовар мешавем, ки мадраса нахустин маркази илмию таълимӣ барои занону духтарон дар Тоҷикистон маҳсуб меёбад. Он ҳамчун ёдгории таърихии аҳамияти ҷумҳуриявидошта ба қайд гирифта шуда, соли 2015 дар шаҳри Алма-Ато дар қатори 4 ёдгории дигари таърихию фарҳангӣ ва меъморӣ — ёдгориҳои меъмории Шайх Муслиҳиддин, Қалъаи Хуҷанд, тасвирҳои рӯйисангӣ ва ёдгориҳои бостонии атрофи шаҳри Хуҷанд ва ноҳияи Ашт, маҷмааи меъмории Мир Раҷабдодҳо «Мадрасаи Оим» низ ба силсилаҷоизаи Шоҳроҳи бузурги Абрешим номнавис шуд. Ин иншоот ба гузаргоҳи Фарғона — Сирдарё тааллуқ дорад. Ин раванд аз он шаҳодат медиҳад, ки ҷомеаи ҷаҳонӣ ба таъриху фарҳанги миллати тоҷик таваҷҷуҳи хоса зоҳир менамояд.

Итминон дорем, ки пас аз таъмиру таҷдид ин ёдгории таърихии шаҳр мавзеи тамошобоби сайёҳӣ гардида, шуҳрати Тоҷикистонро ҳамчун яке аз минтақаҳои сайёҳӣ боз ҳам афзунтар хоҳад сохт. Зеро таъмиру таҷдиди мадраса, пеш аз ҳама, бо мақсади ҳифзу нигоҳдошти мероси ниёгон ва рушди соҳаи сайёҳӣ ба роҳ монда шудааст.

Мавҷуда АНВАРӢ,
АМИТ «Ховар»

 

Апрель 30, 2018 10:19

Хабарҳои дигари ин бахш

САЙРИ БАДАХШОН. Дар вилоят 647 адад ёдгориҳои таърихӣ, табиӣ ва монументалӣ ҷойгир мебошанд
Имрӯз дар ноҳияҳои кӯҳии Тоҷикистон ҳаво то 35 дараҷа гарм мешавад
Дар ноҳияи Дарвоз истеҳсоли картошка 3 баробар, сабзавот 5 ва мева 9 баробар афзоиш ёфтааст
РАҚАМИКУНОНӢ. Маркази тамос барои хизматрасонӣ ба нафақагирон тавассути рақами кутоҳи 3900 фаъол гардид
ТАҒЙИРЁБИИ ИҚЛИМ. Чӣ гуна худ ва атрофиёнро аз чангу ғубор муҳофизат намоем?
МАСЛИҲАТИ МУТАХАССИС. Барои фоиданокӣ қаламфури булғориро бе коркард, дар шакли тару тоза истифода баред
Дар шаҳри Бӯстон сохтмони корхонаи муосири забҳи парранда идома дорад
Имрӯз дар Тоҷикистон чангу ғубор ба амал меояд
Бо гузашти 28 сол аҳамияти Ваҳдати миллӣ дар рушди иқтисодии Тоҷикистон бештар эҳсос мешавад
Фаъолияти иҷтимоӣ ва фарҳангӣ яке аз воситаҳои муассири таҳкими ваҳдати миллӣ мебошад
Муовини Раиси ноҳияи Данғара Зуҳро Ҳакимзода: «Мардум ба Пешвои миллат боварӣ ва эътимод дорад»
Тоҷикистон дар партави ваҳдати миллӣ ба сӯи шукуфоии нав қадам мегузорад