Кормандони мақомоти иҷроияи ҳокимияти давлатии ноҳияи Дарвоз баъди ду моҳ соҳиби бинои нав мегарданд
![](https://khovar.tj/wp-content/uploads/2018/04/Kormandoni-MIHD-no-iyai-Darvoz-badi-du-mo-so-ibi-binoi-navi-seoshyona-megardand.jpg)
ХОРУҒ 12.04.2018 /АМИТ «Ховар»/. Таҳкурсии бинои сеошёна барои кормандони мақомоти иҷроияи ҳокимияти давлатии ноҳияи Дарвоз моҳи сентябри соли гузашта гузошта шуд ва мутобиқи нақша, бинокорон бояд онро давоми як сол ба истифода медоданд. Азбаски ҳавои зимистони имсола барои корҳои сохтмонӣ мусоид буд ва дар маблағгузорӣ низ ҳеҷ мушкиле пеш наомад, коргарон тасмим гирифтанд, ки бинои навбунёдро то фарорасии ҷашни Ваҳдати миллӣ мавриди баҳрабардорӣ қарор диҳанд.
Сардори Ҷамъияти дорои масъулияти маҳдуди «Болдинг компания» Абдулҳомид Ҳоҷатов, ки бунёди бинои мазкурро бар уҳда дорад, изҳор дошт, ки «барои бунёди ин бино Дирексияи сохтмони иншооти ҳукуматии Дастгоҳи иҷроияи Президенти Ҷумҳурии Тоҷикистон зиёда аз 6 миллион сомонӣ ҷудо кард. То имрӯз ба маблағи қариб 2 миллион сомонӣ корҳои сохтмонӣ анҷом дода шуданд. Дар сохтмони мазкур 44 нафар аз ҷавонони маҳаллӣ кор мекунанд ва музди меҳнаташонро сари вақт мегиранд. Сифати кори бинокорон аз ҳар ҷиҳат ба масолеҳи сохтмонӣ вобастагӣ дорад».