Дар «Боғи Ирам»-и шаҳри Душанбе Рӯзи оҳангарон доир карда шуд

Май 14, 2018 11:10

ДУШАНБЕ, 14.05.2018. /АМИТ «Ховар»/.  Бахшида ба Соли рушди сайёҳӣ ва ҳунарҳои мардумӣ бо ташаббуси Кумитаи рушди сайёҳии назди Ҳукумати Ҷумҳурии Тоҷикистон 13 майи соли равон дар Боғи Ирам Рӯзи оҳангарон доир карда шуд.

Тавре хабарнигори АМИТ «Ховар» хабар медиҳад,  дар намоишгоҳ оҳангарон аз тамоми ҷумҳурӣ иштирок намуда, маҳсули сохтаи худро аз қабили каланд, бел, теша, хоркантеша, табар, болға, дос, гулмех, наъл, корд, шамшер, оташгирак ва ғайраҳоро ба маъраз гузоштанд.

Намояндагони Кумитаи рушди сайёҳӣ, вазорату идораҳо, сокинони пойтахт  ва меҳмонону сайёҳон ба намоишгоҳи мазкур ташриф оварда, таассуротҳои худро аз тамошои маҳсули дасти оҳангарон рангину хотирмон арзёбӣ намуданд.

Мавриди зикр аст, ки оҳангарӣ яке аз касбҳои маъмули мардуми тоҷик буда, мардуми мо ин касбро аз давраи Кова ба ёд дорад. Сабаби як андоза бардавом будани ин пеша ниёз ва талаботи мардум ба маҳсулоти оҳангарӣ мебошад. Дар гузашта устохона ё корхонаҳои оҳангарӣ дар ҳар шаҳру деҳа мавҷуд буданд. Тибқи маълумот, оҳангарӣ аз чилу як ҳунар иборат буда, ҳар яке аз дигар фарқ дорад, яъне устои каландгар, мехгар, мисгар, дегрез, наълкӯб, кордсоз, қуфлсоз ва амсоли инҳо.

Оҳангарӣ имрӯз низ дар шаҳру ноҳияҳои ҷумҳурӣ маъмул аст. Суҳроб Ҳотамов аз зумраи ҷавононест, ки  ин касбро аз падар омӯхта, дар деҳаи Шилмаки ноҳияи Рашт дӯкони оҳангарӣ дорад ва эҳтиёҷоти мардумро қонеъ карда истодааст. Ӯ асосан дос, каланд, табару теша ва наъл месозад, ки талаботи мардум асосан ба ҳамин маҳсулот зиёд аст.

“Вақтҳои охир касби оҳангарӣ хеле кам гардида, дари чандин дӯкони оҳангарӣ баста шуда буд. Хушбахтона, бо эълон гаштани Соли рушди сайёҳӣ ва ҳунарҳои мардумӣ ин касби бобоӣ дубора эҳё шуд”, — гуфт Суҳроб Ҳотамов.

Бояд тазаккур дод, ки доир кардани чунин намоишгоҳҳо ба оҳангарон имконият фароҳам меорад, то касбияти баланди хешро ба дигарон  нишон дода, маҳсули заҳматашонро ба фурӯш бароранд. Муваффақияти ҳар як оҳангар дар алоҳидагӣ боиси дар маҷмӯъ рушд кардани ҳунари оҳангарӣ ва муаррифӣ шудани он ба рушди соҳаи сайёҳӣ ва ҳунарҳои мардумӣ таъсири амиқ мегузорад.

Рӯзи оҳангарон дар доираи нақша-чорабиниҳои Кумитаи рушди сайёҳӣ бахшида ба Соли рушди сайёҳӣ ва ҳунарҳои мардумӣ сурат гирифта, қаблан Рӯзи заргарон баргузор шуда буд ва минбаъд баргузории Рӯзи чармгарон, Рӯзи чӯбтарошон, Рӯзи косибон, Рӯзи чакандӯзон ва Рӯзи атласбофон низ дар назар дошта шудааст.

 

Май 14, 2018 11:10

Хабарҳои дигари ин бахш

Эмомалӣ Раҳмон: «Ташрифи сайёҳон ба Вилояти Мухтори Кӯҳистони Бадахшон 13 баробар афзудааст»
РУШДИ САЙЁҲӢ. Имсол ба вилояти Суғд беш аз 242 ҳазор меҳмони хориҷӣ ворид шудааст
РУШДИ САЙЁҲӢ. Табиати дилфиреби Хатлонзаминро беш аз 400 ҳазор нафар сайёҳон тамошо намуданд
Сарвари давлат Эмомалӣ Раҳмон дар ноҳияи Дарвоз аз деҳаи этнографии комплекси сайёҳии «ЗЕВ.С» дидан намуданд
Пешвои миллат Эмомалӣ Раҳмон дар ноҳияи Дарвоз ба фаъолияти комплекси сайёҳии «ЗЕВ.С» оғоз бахшиданд
РУШДИ САЙЁҲӢ. Имсол 1612 нафар сайёҳон табиати нотакрори Бадахшонро тамошо карданд
«ХАТЛОН-ҚАЛБИ ГАРМИ САЙЁҲӢ». Дар шаҳри Кӯлоб форум ва намоишгоҳи байналмилалии сайёҳӣ доир гардид
«САЁҲАТ БА ҚАЛБИ АВРУОСИЁ». 12 июл иштирокчиёни экспедитсияи байналмилалӣ ба Тоҷикистон мерасанд
«ХАТЛОН-ҚАЛБИ ГАРМИ САЙЁҲӢ». Дар Кӯлоб форум ва намоишгоҳи байналмилалии сайёҳӣ доир мешавад
Дар мавзуи «Нақши Ваҳдати миллӣ дар рушди иқтисоди миллӣ ва сайёҳию соҳибкорӣ» ҳамоиш баргузор шуд
Экспедитсияи сайёҳии «Саёҳат ба қалби Авруосиё-2025» аз Москва оғоз гардид
Тоҷикистону Ҳиндустон ҳамкории фарҳангӣ ва сайёҳиро таҳким мебахшанд