«Корвони саломатӣ» ба сокинони шаҳри Бохтар хизмати тиббии ройгон расонд

ДУШАНБЕ, 14.05.2018 /АМИТ «Ховар»/. Ҷиҳати таъмини сатҳи сиҳатии сокинон ва пешгирии онҳо  аз гирифторшавӣ ба  маризиву бемориҳои мухталиф  «Корвони саломатӣ»-и  навбатии Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ба шаҳри Бохтари  вилояти Хатлон сафарбар гардид.

Тавре аз Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ба АМИТ «Ховар» хабар доданд, ба чорабинии мазкур беш аз  100 нафар мутахассисони ботаҷрибаи соҳа, аз ҷумла намояндагони Вазорати тандурустӣ, роҳбарони муассисаҳои тиббии ҷумҳуриявӣ, устодони муассисаҳои олии таълимии тиббӣ ва дигар шахсони масъул ҷалб гардиданд.

Бино ба иттилои манбаъ, дар рафти чорабинӣ зиёда аз 4 ҳазор нафар сокинони шаҳри Бохтар аз хизматрасонии ройгони тиббӣ бархӯрдор гардиданд. Аз ҷумла, 169 нафар аз ташхиси ВНМО,  543 нафар аз ташхиси ултрасадоӣ ва 205 нафар аз ташхиси флюриографӣ гузаштанд. Инчунин 110 кӯдак хатна ва 10 нафари дигар ҷарроҳии чашм карда шуданд.

Ҳамзамон ба шахсони маъюб аробачаи маъюбӣ ва асобағал (асо барои нобиноён) тақдим гардид.