Нишасти матбуотӣ оид ба натиҷаҳои Конфронси байналмилалии сатҳи баланд оид ба «Муқовимат бо терроризм ва ифротгароии хушунатомез» дар шаҳри Риёз

ДУШАНБЕ, 31.05.2018 /АМИТ «Ховар»/.  30 майи соли 2018 Сафири Ҷумҳурии Тоҷикистон дар Шоҳигарии Арабистони Саудӣ Заробиддин Қосимӣ дар шаҳри Риёз доир ба  Конфронси байналмилалии сатҳи баланд «Муқовимат бо терроризм ва ифротгароии хушунатомез», ки 3-4 майи соли 2018 дар шаҳри Душанбе баргузор гардид, брифинги матбуотӣ орост.

Тавре ба АМИТ «Ховар» аз Вазорати корҳои хориҷии Ҷумҳурии Тоҷикистон хабар доданд, таваҷҷуҳи зиёд ба таърих ва таҷрибаи сулҳсозии Тоҷикистон, талошҳои беназири Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар роҳи таъмини сулҳу осоиш ва ҳамчунин ба усулҳои пешгирӣ аз ифротгароии динӣ ва тарғиби исломи муътадилу таҳаммулпазир зоҳир гардид.

Бо истифода аз фурсати муносиб доир ба ташаббусҳои байналмилалии Тоҷикистон дар соҳаи об, истифодаи босамари захираҳои фаровони обии кишвар ба  ҳозирин маълумоти ҷолиб пешниҳод гардид. Зимнан иттилоъ дода шуд, ки 20-22 июни соли 2018 Тоҷикистон мизбони Конфронси сатҳи баланд оид ба Даҳсолаи байналмилалии амал «Об барои рушди устувор» барои солҳои 2018-2028 хоҳад буд.

Масоили вобаста ба ҳамкории иқтисодию тиҷоратӣ ва сармоягузорию сайёҳӣ, аз ҷумла, роҳандозии хатсайрҳои мустақими ҳавоӣ байни Ҷумҳурии Тоҷикистон ва Шоҳигарии Арабистони Саудӣ низ аз мавзӯъҳои муҳими брифинг буд.