Олимону рӯзноманигорони тоҷик аз осорхонаи устод Айнӣ, воқеъ дар Самарқанд боздид намуданд

Май 11, 2018 11:25

ДУШАНБЕ, 11.05.2018 /АМИТ «Ховар»/. Бахшида ба 140-солагии сардафтари адабиёти муосири тоҷик устод Садриддин Айнӣ як гурӯҳ аз олимону рӯзноманигорони тоҷик, аз ҷумла набераи устод Айнӣ Эраҷ Айнӣ, Диловари Лоиқ, шоири русзабон Алексей Афғонов, рӯзноманигори аксбардор Шуҳратёр аз осорхонаи ба номи Айнӣ воқеъ дар шаҳри Самарқанди Ҷумҳурии Ӯзбекистон боздид намуданд.

Меҳмононро шоири маъруфи Самарқанд Аслиддин Қамарзода, забоншинос Амина Шарофиддинова ва мактаббачагон ҳамроҳӣ карданд. Дар рафти боздид аз ҳаёту фаъолият, асарҳои эҷодкарда ва заҳмату талошҳои адиби забардаст дар рушди адабиёти тоҷик сухан гуфта шуд.

Зикр гардид, ки осорхона ба ҳаёт ва фаъолияти илмиву адабии шоир ва нависандаи маъруфи тоҷик, тарҷумон ва адабиётшиноси варзида Садриддин Айнӣ бахшида шудааст. Он аз ҳуҷраҳои истиқоматӣ ва ду утоқи кории устод иборат буда, асарҳои ҷовидонаи «Ғуломон», «Одина», «Ятим», «Мактаби куҳна» ва «Исёни Муқаннаъ» дар ҳамин ҷо офарида шудаанд.

Хотиррасон менамоем, ки осорхонаи устод Айнӣ дар маркази қисмати қадимаи шаҳри Самарқанд, дар наздикии ансамблҳои меъмории «Регистон» ва «Гӯри мир» ҷойгир шудааст. Устод дар ин хона қариб 35 сол, то оғози солҳои 50 – уми асри гузашта умр ба сар бурдааст. Хона аз ду қисм иборат буда, қисмати аввали он охири асри XVIII – оғози асри XIX сохта шудааст. Қисмати дуюми онро устод бо рафиқонаш солҳои 30–юми асри гузашта бо дастони худаш бино кардааст.

Дар осорхона метавон бо ашёи худи устод, аз ҷумла, мизи кориаш шинос гардид. Дар кунҷи хонаи нақшинкорӣ сандалии устод нигоҳ дошта шудааст. Дар ҳавлӣ ниҳолҳои шинондаи устод қомат афрохтаанд. Намунаи рӯзнома ва маҷаллаҳое, ки дар нимаи аввали асри ХХ бо забони тоҷикӣ нашр мешуданд, низ дар ҳамин ҷо гирд оварда шудаанд.

Баъди боздид аз осорхона дар факултети забон ва адабиёти тоҷики Донишгоҳи давлатии шаҳри Самарқанд бо иштироки омӯзгорону донишҷӯён конференсияи илмӣ доир гардид. Иштирокдорон дар бораи ҳаёт ва эҷодиёти устод Айнӣ маърӯза ва шеърҳо қироат карданд.

Май 11, 2018 11:25

Хабарҳои дигари ин бахш

Дар Душанбе дуюмин Синамоҷашнвораи байналмилалӣ «Тоҷи сомон» баргузор мегардад
Дар театри Муҳаммадҷон Қосимов намоишномаи «Ман Таҳминаам…» аз рӯи достони «Шоҳнома» пешниҳод мегардад
Бо ташаббуси Агентии ҳифзи мероси таърихию фарҳангӣ дар ноҳияи Ховалинг Рӯзи Ваҳдати миллӣ ҷашн гирифта шуд
Шоири халқии Тоҷикистон Камол Насрулло: «Ҳақиқат ин аст, ки Пешвои миллат ваҳдатро бунёд гузошту таҳким доду қавӣ сохт»
Дар Осорхонаи миллӣ гӯшаи доимоамалкунандаи «Ваҳдати миллӣ» ташкил гардидааст
Тамоми комёбиҳои миллат ва саодати рӯзгори мардум аз иттиҳоди миллӣ ибтидо мегирад
«ЭМОМАЛӢ РАҲМОН – МЕЪМОРИ СУЛҲУ ВАҲДАТ». Дар Вазорати фарҳанг ҳамоиши илмӣ доир гардид
Таҳти унвони «Қисса ва ҳикояҳо» китоби Абдурофеъ Рабизода нашр гардид
«ДАР МЕҲМОНИИ ДУШАНБЕ». Фестивали байналмилалии эҷодиёти бадеии кӯдакон ва наврасони ИДМ оғоз гардид
Дар Агентии ҳифзи мероси таърихию фарҳангӣ таҳти унвони «Ваҳдати миллат — бақои миллат!» ҳамоиш баргузор шуд
Дар ёдгории Ҳалқаҷари ноҳияи Хуросон бозёфти нодири таърихӣ — «обкӯзаи хонуми Сагкин» кашф гардид
«Душанбе — нусхае аз биҳишт». Таҳти ин унвон дар васфи пойтахти Тоҷикистон китоб ба нашр расид