«ЯК РӮЗИ ВЕЛОСИПЕДРОНӢ». 5 май дар Тоҷикистон ҳамоиши ҷумҳуриявӣ доир мешавад

ДУШАНБЕ, 01.05.2018 /АМИТ «Ховар»/. Бахшида   Рӯзи ҷавонони Тоҷикистон 5 майи соли равон дар Тоҷикистон ҳамоиши ҷумҳуриявии «Як рӯзи велосипедронӣ» доир мешавад.

Тавре ба АМИТ «Ховар» аз Кумитаи кор бо ҷавонон ва варзиши назди Ҳукумати ҷумҳурӣ хабар доданд, дар ҳамоиши мазкур кормандони вазорату идораҳо, ташкилоту муассисаҳо, донишҷӯён ва хонандагони синфҳои болоӣ бидуни хизматрасонии нақлиётӣ тавассути дучарха ба кор ва машғулиятҳо ҳозир мешаванд. Мақсад аз роҳандозӣ намудани иқдоми мазкур ин рушди оммавигардонии варзиши намуди велосипедронӣ ва тарғиби ташаккули тарзи ҳаёти солим мебошад.

Ҳамчунин давоми рӯз дар боғҳои фарҳангӣ — фароғатӣ ва гулгаштҳои ҳудуди ҷумҳурӣ сокинон ба таври васеъ ба ин намуди варзиш ҷалб карда мешаванд.