САҲА Конференсияи «Об барои рушди устувор»-и Душанберо дастгирӣ менамояд

ДУШАНБЕ, 20.06.2018 /АМИТ «Ховар»/. 20 июни соли 2018 дар Душанбе Конференсияи дурӯзаи байналмилалии сатҳи баланд оид ба Даҳсолаи байналмилалии амал «Об барои рушди устувор, 2018-2028» кори худро оғоз намуд. Конференсия аз ҷониби Ҳукумати Ҷумҳурии Тоҷикистон дар ҳамкорӣ бо Департаменти масъалаҳои иқтисодӣ ва иҷтимоии СММ, механизми «СММ-захираҳои вобаста ба об» дар ҳамкорӣ бо Созмони Амнияту Ҳамкории Аврупо (САҲА) ва дигар созмонҳои байналмилалӣ доир мегардад.

САҲА ҷиҳати расонидани кумак ба рушди устувори захираҳои об баҳри баланд бардоштани сатҳи амният, шукуфоӣ ва ҳифзи муҳити зист ҳамкори деринаи Ҳукумати Тоҷикистон аст.

Сафир Вук Жугич, Ҳамоҳангсози фаъолияти иқтисодӣ ва экологии САҲА зимни суханронии худ иброз намуд, ки об кишварҳои истифодабарандаи захираҳои обии фаромарзиро муттаҳид менамояд. Идоранамоии муштараки захираҳои об метавонад омили беҳтар гардидани муносибатҳои байни кишварҳо ва таҳкими амният, шукуфоӣ ва ҳифзи муҳити зист гардад. «Об метавонад сарчашмаи ҳамкорӣ низ гардад. Барои ин зарур аст, ки САҲА тамоми кӯшишҳои худро ба кори мусоидат намудан ба дипломатияи самаранок дар масъалаҳои захираҳои об равона кунад»,- афзуд Жугич.

Дар рӯзи дуюми конференсия САҲА якҷоя бо Комиссияи иқтисодии Аврупои Созмони Милали Муттаҳид мусоҳибаҳои марбут ба Панели амалҳо оид ба ҳамкории фаромарзӣ ва дипломатия оид ба масъалаҳои захираҳои обро доир менамоянд.

Дар конференсия намояндагони агентиҳои Созмони Милали Муттаҳид, созмонҳои байналмилалӣ ва минтақавӣ, муассисаҳои байналмилалии молиявӣ, ҷомеаи соҳибкорӣ, созмонҳои ғайриҳукуматӣ, ҷомеаи шаҳрвандӣ, аз ҷумла, олимон ва коршиносон ширкат доранд.