ТВ «РОССИЯ-1»: «ПЕШГӮИИ ПРЕЗИДЕНТИ ТОҶИКИСТОН РОСТ БАРОМАД». Пешвои миллат Эмомалӣ Раҳмон қабл аз оғози бозии нахустини Чемпионати ҷаҳон-2018 гуфтанд, ки тӯби аввалро Россия мезанад

ДУШАНБЕ, 15.06.2018./АМИТ «Ховар»/.  Тавре мо аллакай хабар додем, шоми дирӯз Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар маросими ифтитоҳи Чемпионати ҷаҳон оид ба футбол-2018 дар шаҳри Москваи Федератсияи Россия иштирок карданд.

Шабакаи телевизионии «Россия-1» дирӯз дар барномаи «Вести» сужаеро пахш намуд, ки дар он дида мешуд чи тавр Пешвои миллат  ҳангоми расидан ба фурудгоҳи Москва бо тилисми Чемпионати ҷаҳон -2018 —  Волк Забивака тӯббозӣ ва чанд калима раду бадал намуданд: «Кӣ голи аввалинро мезанад? Фикр мекунам, Россия», — гуфтанд Сарвари давлат. «Пешгӯии Президенти Тоҷикистон рост баромад», —  иброз дошт муаллифи сужаи барномаи «Вести».

Бозии нахустини Чемпионати ҷаҳонро байни дастаҳои мунтахаби Россия ва Арабистони Саудӣ, ки бо ғалабаи Россия анҷом ёфт, роҳбарони давлатҳои ИДМ ва дигар кишварҳои ҷаҳон бевосита тамошо карданд. Дар ҷои ифтихорӣ миёни меҳмонон дар Варзишгоҳи «Лужники»-и Москва Пешвои миллат муҳтарам Эмомалӣ Раҳмон низ нишаста буданд. Дарвоқеъ,  тӯби аввалро дар ин бозӣ  бозингари  дастаи мунтахаби Россия Юрий Газинский ба нишон расонид.  Дар интиҳо футболбозони Россия бо ҳисоби калони 5:0 ғолиб омаданд.