Лоиҳаи «Рушди чорводорӣ ва чарогоҳҳо» ба ҷамъиятҳои истифодабарандаи чарогоҳҳо 133 адад трактор дастрас намуд

ДУШАНБЕ, 16.07.2018 /АМИТ «Ховар»/.  Бо мақсади сари вақт анҷом додани кишту кор ва ҷамъоварӣ намудани ҳосили зироати хӯроки чорво Муассисаи давлатии «Маркази идораи Лоиҳаи «Рушди чорводорӣ ва чарогоҳҳо» дар асоси дархост ба ҷамъиятҳои истифодабарандаи чарогоҳҳо 8 адад комбайни ғалладаравӣ, 133 адад тракторҳо, 32 адад ғаллакӯбаки истеҳсоли ватанӣ, 10 адад таҷҳизот барои ҷамъоварии хӯроки чорво, 190 адад алафдаравакҳои гуногун ва дигар намуди техника ва мошинолот дастрас намуд.

Ин нуктаро имрӯз директори Маркази идораи Лоиҳаи «Рушди чорводорӣ ва чарогоҳҳо» Саъдӣ Каримзода зимни нишасти матбуотии ин ниҳод иброз намуд.

Ҳамчунин ба иттилои номбурда, аз сабаби гарм омадани ҳаво, хусусан дар ҷануби кишвар дар чарогоҳҳо хушкшавии алафҳо ба назар расид.

Маркази идораи Лоиҳаи «Рушди чорводорӣ ва чарогоҳҳо» дар самти беҳтар намудани заминаи истеҳсоли хӯроки чорво хонаводаҳои эҳтиёҷманди ҷамъиятҳои истифодабарандагони чарогоҳҳои ноҳияҳои Темурмалик, Шамсиддини Шоҳин, Муъминобод, Балҷувон ва Ховалинги вилояти Хатлонро бо 109,7 тонна тухмии зироати хӯроки чорво ва 593 тонна нуриҳои миниералӣ таъмин намуд.