НИШАСТҲОИ МАТБУОТӢ: риоя нагардидани талаботи қонунгузорӣ дар корхонаҳо ошкор ва шахсони масъул ба ҷавобгарӣ кашида шуданд

ДУШАНБЕ, 23.07.2018. /АМИТ «Ховар»/. Аз ҷониби кормандони Хадамоти назорати давлатии бехатарии корҳо дар саноат ва соҳаи кӯҳкории назди Ҳукумати Ҷумҳурии Тоҷикистон шахсони масъули корхонаҳое, ки дар фаъолияти онҳо риоя нагардидани талаботи қонунгузории амалкунандаи мамлакат ошкор карда шуд, ба ҷавобгарии маъмурӣ кашида шуданд. Ин нуктаро имрӯз, 23 июл сардори Хадамоти мазкур Санъат Раҳим зимни нишасти матбуотӣ дар Маркази матбуоти ҷумҳуриявии АМИТ «Ховар» ба хабарнигорон иброз дошт.

Ба иттилои ӯ, шахсони зикршуда ба маблағи 285 ҳазору 844 сомонӣ ҷарима баста шуданд.

«ҶДММ «Сохтмон-3», ҶДММ «Мавлак», «ҶДММ «Хуаксин Ғаюр Суғд Семент», ҶДММ «Сарватҳои кӯҳӣ» ва ҶДММ «Саманд» аз зумраи корхонаҳое мебошанд, ки барои дар фаъолияташон риоя нагардидани талаботи қонунгузории амалкунандаи мамлакат ҷарима шудаанд»,-илова намуд Санъат Раҳим.

Зикр шуд, ки дар фаъолияти аксари корхонаҳо риоя нагардидани талаботи қонунгузорӣ, ба монанди надоштани лоиҳаи коркарди конҳои канданиҳои фоиданок, мавҷуд набудани нақшаи рушди корҳои кӯҳӣ, таъмин набудани корхонаҳо бо мутахассисони соҳавӣ ва дар феҳристи давлатӣ ба қайд нагузаштани иншоот ошкор карда шуданд.