«ШИРМОЛАҲОИ МАҲТОБӢ». Нашриёти «Адиб» бо чунин ном китоби новеллаҳои нависандаи Ӯзбекистонро аз чоп баровард

ДУШАНБЕ, 09.08.2018. /АМИТ «Ховар»/. «Ширмолаҳои маҳтобӣ»- таҳти чунин унвон  нашриёти «Адиб» маҷмӯаи  новеллаҳои  адиби  тоҷиктабори Ӯзбекистон Шариф Халилро аз чоп баровард.  «Ширмолаҳои маҳтобӣ» китоби дуюми   нависандаи ҷавон  мебошад, ки новеллаҳо ва  ҳикоёти хурдро дар бар гирифтааст.

Дар суҳбат ба хабарнигори АМИТ «Ховар» Шариф Халил гуфт, ки новеллаҳо дар мавзӯъҳои гуногун навишта шуда,  хонандаро  ба рангорангии ҳаёт  ошно месозад. Мавзӯъҳои доғи зиндагӣ, аз ҷумла ҳаёти муҳоҷирон,  мушкилоти имрӯзи мактабу маориф, муборизаи хайру шар, ҳаёти ботаҷрибаи мӯйсафедони деҳотӣ  аз мавзӯъҳои меҳварии китоби «Ширмолаҳои маҳтобӣ» маҳсуб меёбанд, ки бо сабки  дилнишин  эҷод гардидааст.

Мавриди зикр аст, ки китоби нахустини адиби ҷавон  Шариф Халил  соли 2016  бо номи «Дар пошнаи кӯҳи баланд» дар  нашриёти «Тамаддун»- и шаҳри Тошканд нашр гардида буд. Шариф Халил дастпарвари  бахши журналистикаи Донишгоҳи миллии Тоҷикистон буда, дар шаҳри Термези Ҷумҳурии Ӯзбекистон  сукунат дорад.