Ба кормандони Суди ноҳияи Тоҷикобод дар арафаи ҷашни Истиқлолияти давлатӣ бинои замонавӣ туҳфа гардид
![](https://khovar.tj/wp-content/uploads/2018/09/Tochikobod.jpg)
ТОҶИКОБОД, 07.09.2018 /АМИТ «Ховар»/. Ба ифтихори 27-умин солгарди ҷашни Истиқлолияти давлатии Ҷумҳурии Тоҷикистон дар ноҳияи Тоҷикобод дар фазои тантанавӣ бо иштироки меҳмонону сокинони ноҳия бинои маъмурии Суди ноҳия ба истифода дода шуд. Иншооти мазкур аз ду ошёна иборат буда, бо мизу курсӣ ва дигар таҷҳизоти зарурӣ муҷаҳҳаз гардидааст. Дар сохтмони бинои мазкур аз ҳисоби Суди Олии Ҷумҳурии Тоҷикистон як миллиону 450 ҳазор сомонӣ масраф шудааст.
Тибқи иттилои мутахассиси шуъбаи рушди иҷтимоӣ ва робита бо ҷомеаи мақомоти иҷроияи ҳокимияти давлатии ноҳияи Тоҷикобод Ҳикматулло Абдуллозода, бахшида ба ҷашни Истиқлолияти давлатӣ дар байни донишҷӯёну хонандагони синфҳои болоии муассисаҳои таълимии ҷамоатҳои деҳоти ноҳия зери шиорҳои «Ҳунар беҳ аз симу зар», «Кадбонуи беҳтарин», «Истиқлолият ба занон чӣ дод?», «Ҷашни иқболат муборак, Тоҷикистонам» ва «Соҳибистиқлолему соҳибватан» барномаҳои фарҳангӣ ва мусобиқаҳои варзишӣ доир гардиданд.
Ғолибони мусобиқаҳои варзишӣ дар рӯзи ҷашни 27-умин солгарди Истиқлолияти давлатӣ бо ифтихорнома ва туҳфаҳои хотиравӣ қадрдонӣ мешаванд.