Дар фарҷоми Ҷаласаи навбатии Шӯрои сарони давлатҳои аъзои ИДМ 16 қарор қабул гардид

ДУШАНБЕ, 28.09.2018. /АМИТ «Ховар»/. Имрӯз дар фарҷоми Ҷаласаи навбатии Шӯрои сарони давлатҳои аъзои Иттиҳоди Давлатҳои Мустақил, ки дар Душанбе доир  шуд,  16 қарор ва як қатор изҳорот қабул гардиданд. Миёни онҳо  Изҳороти сарони давлатҳои ИДМ ба муносибати ҷашни 70-солагии қабули Эъломияи ҳуқуқи башар аз 10 декабри соли 1948-ро  метавон махсус зикр намуд. Дар ин бора имрӯз Президенти Ҷумҳурии Тоҷикистон муҳтарам Эмомалӣ Раҳмон зимни нишасти матбуотӣ ба хабарнигорон иброз намуданд.

Пешвои миллат изҳор доштанд, ки «ин санад ҷонибдории ҳамешагии моро дар самти ҳавасмандгардонию ҳифзи ҳуқуқи инсон ва озодиҳои бунёдӣ тасдиқ менамояд».

Таъкид гардид, ки дар ҷаласа ба таҳкими дурнамои ҳамкории кишварҳои аъзои ИДМ дар соҳаҳои таъмини амният ва чораҷӯии фаврӣ бар зидди таҳдидҳои глобалӣ, ҳамкории тиҷоратию иқтисодӣ, энергетикӣ, нақлиёт ва коммуникатсия, аз ҷумла гардиши озоди мол, сармоягузорӣ ва хизматрасонӣ, ҳамкории фарҳангӣ ва  гуманитарӣ таваҷҷуҳи хоса зоҳир карда  шуд.