Рушди ҳунармандӣ дар оила — омили саодату пойдории хонадон

ДУШАНБЕ, 14.09.2018. /АМИТ «Ховар»/. Имрӯз, 14 сентябр, соати 10:00 дар муассисаи давлатии «Душанбе-Плаза» конфронси илмӣ-амалӣ дар мавзӯи «Рушди ҳунармандӣ дар оила — омили саодату пойдории он» баргузор мегардад.

Конфронси мазкур ба 27-солагии Истиқлолияти давлатии Ҷумҳурии Тоҷикистон ва Соли рушди сайёҳӣ ва ҳунарҳои мардумӣ бахшида шудааст.

Тавре аз маркази матбуоти Вазорати фарҳанги Ҷумҳурии Тоҷикистон ба мухбири АМИТ «Ховар» иттилоъ доданд, ҳамоиш аз ҷониби Раёсати кор бо занон ва оилаи мақомоти иҷроияи ҳокимияти давлатии шаҳри Душанбе бо иштироки намояндагони вазорату идораҳо, роҳбарони муассисаҳои таҳсилоти олии касбӣ, сохторҳои шаҳрӣ ва воситаҳои ахбори омма гузаронида мешавад.

Ҳадафи конфронс- ин эҳё намудани ҳунарҳои мардумӣ, ташаккули фарҳанги хонавода ва боло бурдани сатҳи зиндагии аҳолӣ мебошад.