«Bangabandhu Gold Cup»: дастаи мунтахаби Тоҷикистон 12 октябр дар финали ин мусобиқот ба майдон мебарояд!

ДУШАНБЕ,10.10.2018 /АМИТ «Ховар»/.  Тавре дирӯз хабар додем, шоми 9 октябр дастаи мунтахаби асосии футболи Тоҷикистон дар доираи бозиҳои нимниҳоии мусобиқоти «Bangabandhu Gold Cup», ки дар Бангладеш ҷараён дорад, дар бозии нимниҳоӣ дастаи мунтахаби Филиппинро бо натиҷаи 2:0 шикаст дода, ба бозии финалӣ росхат гирифт.  

Фуболбозони мо аз аввал то ба охир дар ин вохӯрӣ ба бартарӣ соҳиб буданд ва ба Комрон Турсунов муяссар шуд, ки ҳисобро дар дақиқаи 31-ум боз кунад. Фурсатҳои мувофиқ барои голзанӣ яке аз паси дигар пайдо мешуданд, аммо танҳо ба Аҳтам Назаров имкон фароҳам омад, ки дар дақиқаи 97-ум тӯби дуввумро ба дарвозаи иштирокдорони бозиҳои финалии Чемпионати Осиё – 2019-дастаи мунтахаби Филиппин занад.

Ба ҳамин тартиб, дастаи мунтахаби Тоҷикистон дар вохӯрии ниҳоӣ 12-уми октябр бо ғолиби ҷуфти дуввуми бозии нимниҳоӣ бо ширкати дастаҳои Фаластин ва Бангладеш, ки имрӯз сурат мегирад, қувва месанҷад.

Ёдрас мешавем, ки мусобиқоти «Bangabandhu Gold Cup» бори шашум бо иштироки шаш дастаи Осиё гузаронида мешавад ва Тоҷикистон дар он бори аввал ширкат меварзад.

Мусобиқаи байналмилалии  «Bangabandhu Gold Cup»

Бозии нимниҳоӣ

Филиппин – ТОҶИКИСТОН – 0:2

Голҳо: Комрон Турсунов, 31 (0:1). Аҳтам Назаров, 90+7 (0:2).

Тоҷикистон: Рустам Ризоев, Сиёвуш Асроров, Хуршед Бекназаров, Амирбек Ҷӯрабоев (Ойбек Абдуғаффоров, 90+10), Табрези Давлатмир, Аҳтам Назаров, Муҳаммадҷон Раҳимов (Нозим Бобоҷонов, 70), Ҳикматулло Расулов, Фатҳулло Фатҳуллоев, Комрон Турсунов,  Ҷахонгир Эргашев (Комрони Мирзонаҷот, 88).

Огоҳӣ: Ян Кларино, Анхел Гуирадо (Филиппин), Мухаммадҷон Раҳимов (Тоҷикистон).

Довар дар майдон: Маҳмуд Алмаҷарафи (Уммон).

9 октябр. Варзишгоҳи “Кокс-Базар” (Бангладеш).