ФУТБОЛ: дастаҳои «Истиқлол» ва «Хуҷанд» бар ҳарифонашон ғолиб омаданд
![](https://khovar.tj/wp-content/uploads/2018/10/Novyj-risunok-41.jpg)
ДУШАНБЕ, 17.10.2018 /АМИТ «Ховар»/. Чанд лаҳза пеш дар Варзишгоҳи марказии ҷумҳуриявии шаҳри Душанбе бозиҳои аввали ½-ниҳоии Ҷоми Тоҷикистон байни дастаҳои футболи «Истиқлол»-и Душанбе ва «Душанбе-83»-и Душанбе баргузор шуданд.
Тавре мухбири АМИТ «Ховар» Меҳрони Қурбон хабар медиҳад, дар ин вохӯрии ҷолиб дастаи футболи «Истиқлол» бо ҳисоби 3:1 бар дастаи футболи «Душанбе-83» ғолиб омад. Голҳоро дар ин бозӣ дар дақиқаҳои 11, 54, 59 ва 65 Ҷаҳонгир Абдулманонов, Нозим Бобоҷонов, Аҳтам Назаров ва Элчибек Рашидбеков ба ҳадаф расониданд.
Ҳамчунин имрӯз вохӯрии дигари ниҳоии Ҷоми Тоҷикистон байни дастаҳои футболи «Регар-ТадАЗ»-и Турсунзода ва «Хуҷанд»-и шаҳри Хуҷанд дар варзишгоҳи «Талко – Арена»-и шаҳри Турсунзода доир гардид.
Дар ин рақобат дастаи футболи «Хуҷанд»-и шаҳри Хуҷанд дастаи «Регар-ТадАЗ»-и Турсунзодаро бо ҳисоби 1:0 мағлуб намуд.
Ёдовар мешавем, ки дар бозиҳои нимниҳоии Ҷоми Тоҷикистон ягона намояндаи Лигаи якуми Чемпионати Тоҷикистон- «Душанбе-83» то ҳанӯз муборизаро идома медиҳад.