Бо мусоидати мақомоти милитсияи шаҳри Душанбе 3 нафар аъзои ҳизбу ҳаракатҳои ифротӣ ба Ватан баргаштанд
![](https://khovar.tj/wp-content/uploads/2018/11/330.jpg)
ДУШАНБЕ, 21.11.2018. /АМИТ «Ховар»/. Дар натиҷаи гузаронидани корҳои фаҳмондадиҳӣ, тарғиби пайвастаи ватандӯстиву соҳибдавлатӣ, ҳифзи ҳуқуқи инсон ва ҳамкории судманди мақомоти милитсияи пойтахт бо сокинон, алалхусус бо аҳли хонавода ва наздикони нафарони дар кофтукови расмӣ қарордошта чанде қабл 3 нафар шаҳрвандон, ки бо моддаи 307 иловаи 3 — и Кодекси ҷиноятии Ҷумҳурии Тоҷикистон дар ҷустуҷӯи расмӣ қарор доштанд, бо изҳори пушаймонӣ ва хоҳиши худ ба Ватан баргаштанд.
Тавре аз Раёсати Вазорати корҳои дохилии Ҷумҳурии Тоҷикистон дар шаҳри Душанбе ба АМИТ «Ховар» хабар доданд, ин иқдоми шаҳрвандон дар доираи ташаббусҳои инсондӯстонаву сулҳпарваронаи Пешвои миллат муҳтарам Эмомалӣ Раҳмон дар самти ба Ватан баргардонидани шаҳрвандоне, ки аз гумроҳӣ ба сафи ҳизбу ҳаракатҳои ифротӣ пайвастаанд, амалӣ мегардад.
Бояд гуфт, ки тибқи қонунгузории Ҷумҳурии Тоҷикистон шаҳрвандоне, ки бо сабаби гумроҳӣ ба сафи ҳизбу ҳаракат ва ташкилотҳои террористиву экстремистӣ шомил гардида, бо мақсади паноҳ бурдан аз ҷазои ҷиноятӣ дар кишварҳои хориҷӣ дар ҷустуҷӯи расмӣ қарор доранд, агар аз кирдорҳои қаблан содирнамудаи худ сидқан пушаймонӣ изҳор намуда, бо хоҳиши худ ба мақомоти ҳифзи ҳуқуқи Тоҷикистон ҳозир шаванд, дар ҳолати набудани дигар аломатҳои таркиби ҷиноят дар кирдори онҳо аз ҷавобгарии ҷиноятӣ озод карда мешаванд.
Ба иттилоии манбаъ, шаҳрвандон Маҳмудов Назрӣ Назирмадович, соли таваллудаш 1964, истиқоматкунандаи шаҳри Душанбе, Ҷобиров Олимҷон Ҳотамович, соли таваллудаш 1984, истиқоматкунандаи деҳаи Суғдиёни ҷамоати Алмосии ноҳияи Ҳисор, Қосимов Бахтиёр Шарифович, соли таваллудаш 1979, зодаи ноҳияи Восеи вилояти Хатлон, истиқоматкунандаи шаҳри Душанбе, ки ҳамчун гумонбар дар ҷинояти ташкили фаъолияти ташкилоти экстремистӣ (ифротгароӣ) дар ҷустуҷӯи расмӣ қарор доштанд, ба Ватан баргаштанд.
«Мавриди зикр аст, ки ба ғайр аз худи Бахтиёр Қосимов бо кумаки мақомоти милитсияи пойтахт ҳамсар ва 3 нафар фарзандони ноболиғи 3, 6 ва 10-солаи номбурда ба Ватан баргардонида шуданд»,-хабар дод манбаъ. Айни ҳол нисбат ба ин шаҳрвандон эзоҳи моддаҳои болозикри Кодекси ҷиноятии Ҷумҳурии Тоҷикистон татбиқ карда шуда, онҳо дар ҳузури хонаводаи худ қарор доранд.