«ШАҲРИ ОРЗУҲО». Имрӯз дар он қариб 2 ҳазор нафар тарбиятгирандагони мактаб – интернатҳои ҳудуди Душанбе иштирок намуданд

Декабрь 29, 2018 11:40

ДУШАНБЕ, 29.12.2018. /АМИТ «Ховар»/. Имрӯз дар толори Сирки давлатии Тоҷикистон ба муносибати фарорасии Соли нави мелодӣ барои хонандагону тарбиятгирандагони мактаб-интернатҳои ҳудуди шаҳри Душанбе таҳти унвони «Шаҳри орзуҳо» барномаи рангини консертӣ доир гардид.

Хурсандии кӯдакон ҳадду канор надошт, хабар дод чанд лаҳза пеш хабарнигори АМИТ «Ховар» аз макони баргузории тантанаи идона,  зеро дар баробари тамошои барномаи рангини консертӣ ва саҳнаҳои ҷолиби ҳунармандони Сирки давлатӣ ба онҳо аз номи Раиси шаҳри Душанбе Рустами Эмомалӣ туҳфаҳои солинавӣ тақдим карда шуданд.

Муовини аввали Раиси шаҳри Душанбе Маҳмадсаид Зувайдзода зимни ифтитоҳи барномаи консертӣ паёми табрикии Раиси шаҳр Рустами Эмомалиро ба муносибати Соли нави мелодӣ ба самъи иштирокчиён расонид, ки дар он, аз ҷумла, гуфта мешавад:

«Бачагони азиз, соли равон бо ташаббус ва дастгирии Ҳукумати мамлакат, хусусан Пешвои миллат муҳтарам Эмомалӣ Раҳмон  барои Шумо дар шаҳри Душанбе зиёда аз 100 майдончаи варзишӣ ва бозии кӯдакон бунёд карда шуданд. Шумо, кӯдакони даврони Истиқлолият, ҳамеша дар мадди назари Сарвари давлат ва  Ҳукумати мамлакат  қарор доред ва ҳамчун узви комилҳуқуқи ҷомеа ҳеҷ гоҳ аз ғамхориву таваҷҷуҳи он бебаҳра нахоҳед монд». 

Мавриди зикр аст, ки дар Ҷумҳурии Тоҷикистон аз Конститутсия сар карда, то қонунҳои алоҳида ва барномаҳои махсуси давлатӣ ба ҳифз, ғамхорӣ ва нигоҳубини кӯдакон, аз ҷумла хонандагону тарбиятгирандагони мактаб-интернатҳо равона карда шудаанд. Зеро дар моддаи 34 Конститутсияи  Ҷумҳурии Тоҷикистон дарҷ гардидааст: «Модару кӯдак таҳти ҳимоя ва ғамхории махсуси давлатанд… Давлат барои ҳифзи кӯдакони ятим, маъюб ва таълиму тарбияи онҳо ғамхорӣ менамояд».

Ёдовар мешавем, ки дар барномаи фарҳангии мазкур қариб 2 ҳазор нафар тарбиятгирандагони мактаб – интернатҳои ҳудуди пойтахт ва оилаҳои камбизоати он иштирок намуданд.

Декабрь 29, 2018 11:40

Хабарҳои дигари ин бахш

Пагоҳ дар Душанбе ба муносибати Рӯзи Ваҳдати миллӣ барномаи фарҳангӣ доир мешавад
Дилбар Одилзода: «Ваҳдати миллӣ ва рушди зан дар Тоҷикистон ду раванди бо ҳам пайвастанд»
Раиси шаҳри Душанбе бинои шуъбаи Вазорати корҳои дохилӣ дар ноҳияи Исмоили Сомониро ифтитоҳ намуданд
Рустами Эмомалӣ роҳи мошингарди кӯчаи Бухоро пайваст ба кӯчаи Ҳабибулло Назаровро мавриди истифода қарор доданд
Рустами Эмомалӣ бо Шайх Сурур бин Муҳаммад Оли Наҳён мулоқот намуданд
Тавсеаи робитаҳои бародаршаҳрӣ байни Душанбе ва Теҳрон баррасӣ гардид
Раиси шаҳри Душанбе бо губернатори Ҳукумати мардумии музофоти Шенсии Чин мулоқот намуданд
Рустами Эмомалӣ бо Сафири Ҷопон дар Тоҷикистон Кейко Фурута мулоқот намуданд
Дар Тоҷикистон экспедитсияи сайёҳии «Саёҳат ба қалби Авруосиё-2025» баргузор мешавад
Рустами Эмомалӣ бо Кетрин Мери Рассел мулоқот намуданд
Раиси шаҳри Душанбе Рустами Эмомалӣ бо Раиси Шурои директорони шабакаи телевизионии «Евронюс» Педро Варгас Сантос Давид мулоқот намуданд
Бахшида ба Рӯзи ҷавонони Тоҷикистон ҳамоиши табибони ҷавони шаҳри Душанбе баргузор шуд