ФУТЗАЛ: ҳайати дастаи мунтахаби Тоҷикистон барои бозиҳои дӯстона муайян гардид

ДУШАНБЕ, 07.01.2019 /АМИТ «Ховар»/.  Ҳайати дастаи мунтахаби Тоҷикистон оид ба футзал барои бозиҳои дӯстона бо дастаи миллии Туркия муайян шуд.    Дар ин бора ба мухбири   АМИТ «Ховар»  аз    Федератсияи футболи Тоҷикистон  хабар доданд.

Зикр шуд, ки  бозиҳои мазкур  9-10 январ дар шаҳри Эрзинҷони Туркия баргузор мешаванд. Дар айни замон дастаи мунтахаби Тоҷикистон оид ба футзал зери роҳбарии сармураббӣ Ҳусейн Шодиев дар шаҳри Душанбе баҳри гузаронидани дидори дӯстона бо  дастаи мунтахаби  Туркия машқҳои таълимӣ – дастаҷамъиро ба роҳ мондаанд. Ба ҳайати  дастаи мунтахаби Тоҷикистон  12 футзалбоз бо шумули 2 дарвозабон шомиланд.

Ёдовар мешавем, ки 6  январи соли 2019  дастаи мунтахаби Тоҷикистон ба Истанбул ва дар идома ба шаҳри Эрзинҷон сафар  намуд. Дар ин ҷо даста 9-10  январ бо  дастаи мунтахаби Туркия ду  дидори дӯстона анҷом медиҳад.

Бояд гуфт, ки дидорҳои мазкур барои футзалбозони мо баҳри омодагӣ ба марҳилаи интихобии Чемпионати Осиё – 2020, ки мувофиқи нақшаи КФО аз 16  то 26  октябри соли 2019 сурат мегиранд, таҷрибаи хуб хоҳад буд.