Артиш-мактаби шуҷоатмандӣ. Дар қисмҳои низомии Роғун ва минтақаи Рашт ҳамоишҳои идона доир гардиданд

РОҒУН, 22.02.2019. /АМИТ «Ховар»/. Дар доираи барномаҳои муштараки  Кумитаи иҷроияи Ҳизби Халқии Демократии Тоҷикистон дар шаҳри Роғун  ва Мақомоти иҷроияи ҳокимияти давлатии шаҳри Роғун бахшида ба 26-умин солгарди таъсиси Рӯзи Артиши миллии Ҷумҳурии Тоҷикистон дар қисми низомии 051-058  таҳти унвони  «Муҳофизони Ватан»  байни ҷавонони синни даъватӣ ва сарбозон ҷамъомади оммавии варзишӣ доир гардид.

Ҳадаф аз баргузор намудани чунин ҳамоишҳо ҷалби ҷавонон ба сафи Қувваҳои Мусаллаҳи Ҷумҳурии Тоҷикистон ва пешгирии шомилшавии онҳо ба сафи гурӯҳҳои ифротӣ мебошад.

Бояд гуфт, ки ба ифтихори 26-умин солгарди таъсиси рӯзи Артиши миллӣ ва қадрдонии хизмати афсарону сарбозон аз ҳисоби соҳибкорону  раисони шаҳру навоҳии минтақаи Рашт дар қисмҳои низомии ин минтақа дастархонҳои идона ороста, ба сарбозони фаъолу афсарони содиқ туҳфаҳои хотиравӣ тақдим намуданд. Ҳамзамон баҳри болидахотирии онҳо дар ин минтақаҳои дурдасти ҷумҳурӣ консертҳои идона ташкил карда шуданд.

Ҳамчунин барои ҷалби ҷавонон ба сафи Қувваҳои мусаллаҳ бахшҳои ҷавонони шаҳру ноҳияҳои минтақа бо ин қисмҳои низомӣ ҳамкорӣ менамоянд ва ҷавонони синни даъватӣ аз шароити зиндагии сарбозон огоҳ гардида, дар озмунҳои ватандӯстона фаъолона иштирок менамоянд.