Дар Хатлон барои ҷалби табибон ба корҳои илмӣ мукофотпулӣ таъсис доданд

БОХТАР, 27.02.2019. /АМИТ «Ховар»/. Бо мақсади рушди илми тиб, ҷалб намудани табибони вилоят ба корҳои илмӣ ва ҳавасманд гардонидани онҳо ҳамасола ба табибоне, ки панҷ соли охир дар муассисаҳои тиббии вилоят фаъолият намуда, рисолаҳои илмии номзад ва доктори илмҳои тибро соҳиб мегарданд, мукофотпулиҳо дода мешаванд. Дар ин  бора  раиси  вилояти Хатлон  Қурбон Ҳакимзода   қарори  махсус ба имзо расонид.   

Тавре  аз  шуъбаи иттилоотӣ-таҳлилии  Мақомоти иҷроияи  ҳокимияти давлатии  вилояти Хатлон  ба  хабарнигори АМИТ  «Ховар» иттилоъ  доданд, ҳаҷми мукофотпулӣ барои дифои рисолаи номзадӣ 5 ҳазор сомонӣ ва барои дифои рисолаи докторӣ  10 ҳазор сомонӣ муқаррар карда шудааст.

Ҳамзамон  тибқи  қарори  раиси  вилояти Хатлон  Қурбон Ҳакимзода,  ҳамасола то 1 декабр озмунҳои вилоятии «Беҳтарин муассисаи тиббии сол», «Беҳтарин табиби сол», «Беҳтарин корманди миёнаи тиббии сол» ва «Беҳтарин дастоварди соҳаи тиб дар вилоят» гузаронида мешаванд.

Маблағи мукофотпулии озмунҳои вилоятии «Беҳтарин муассисаи тиббии сол», «Беҳтарин табиби сол», «Беҳтарин корманди миёнаи тиббии сол» ва «Беҳтарин дастоварди соҳаи тиб дар вилоят» ба ҳар як озмун 5 ҳазор сомонӣ, дар маҷмӯъ 20  ҳазор сомонӣ пешбинӣ  шудааст.