Дастаи «Истиқлол» бозиҳои санҷишии худро дар Туркия ба анҷом расонд

ДУШАНБЕ, 08.02.2019. /АМИТ «Ховар»/. Дирӯз чемпиони Тоҷикистон  «Истиқлол»-и Душанбе  охирин бозии санҷишии худро дар шаҳри Анталияи Туркия ба анҷом расонида, аз дастаи  «Суғдиён»-и Ӯзбекистон бо натиҷаи  0:1 мағлуб шуд. Тавре сомонаи расмии клуб хабар медиҳад, ин вохӯрӣ зери борони шадид ҷараён гирифт.

«Истиқлол» -и Душанбе  дар доираи омодагӣ ба бозии интихобии Лигаи чемпионҳои Осиё бо дастаи АГМК-и Алмалик, ки 12 феврал дар Ӯзбекистон баргузор мегардад, 4 бозии таҷрибавию санҷишӣ  доир намуда, бо дастаҳои    «Тобол»-и Қазоқистон (1:2),   «Челик»-и Босния ва Герсоговина (2:0),    «Кёге»-и Дания (1:1),   «Том»-и Россия (2:1) ва  «Суғдиён»-и Ӯзбекистон (0:1) қувва санҷид. Дар вохӯрии охирин Ҳаким Фузайлов он бозингаронеро ба майдон овард, ки дар бозии пешина бо дастаи   «Том» ширкат надоштанд.

Акнун чемпиони Тоҷикистон —  «Истиқлол» баъди машқҳои имрӯза  давраи омодагиро дар Туркия ба анҷом расонида, пагоҳ ба Ӯзбекистон сафар мекунад.

Бозии байни дастаҳои АГМК ва «Истиқлол» 12 феврал баргузор мегардад.

Бозии таҷрибавӣ

«Истиқлол» (Тоҷикистон) – «Суғдиён» (Ӯзбекистон) – 0:1

Гол: Ойбек Нурматов, 19

«Истиқлол» (Душанбе): Рустам Ятимов, Ҷалил Кимсанов, Бахтиёр Қаландаров, Шаҳром Сулаймонов, Фирӯз Қараев, Амирбек Ҷӯрабоев, Нозим Бобоҷонов, Комрон Турсунов, Муҳаммадҷон Раҳимов, Шаҳром Самиев, Шериддин Бобоев.