«Терроризм ва экстремизм-таҳдид ба амнияти кишварҳои ҷаҳон». Таҳти чунин унвон дар Хоруғ конференсияи илмию амалӣ баргузор гардид

Февраль 18, 2019 09:15

ДУШАНБЕ, 18.02.2019 /АМИТ «Ховар»/. «Терроризм ва экстремизм-таҳдид ба амнияти кишварҳои ҷаҳон» -таҳти чунин унвон ба хотири пешгирии шомилшавии ҷавонон ба гурӯҳҳои ифротӣ дар маркази Вилояти Мухтори Кӯҳистони Бадахшон-шаҳри Хоруғ конференсияи илмию амалӣ баргузор гардид. Дар ҳамоиш таъкид гардид, ки аҳли ҷомеа бояд ҷавононро ба вусъати корҳои ободониву созандагӣ ва ҳифзи дастовардҳои даврони соҳибистиқлолӣ талқин намуда, ба ин восита шомилшавии онҳоро ба гурӯҳҳои террористию эктремистӣ пешгирӣ намоянд.

Тавре аз Мақомоти иҷроияи ҳокимияти давлатии ВМКБ ба хабарнигори АМИТ «Ховар» иттилоъ доданд, ҳамоиш бо ибтикори Донишгоҳи давлатии шаҳри Хоруғ ба номи академик Моёншо Назаршоев, Мақомоти иҷроияи ҳокимияти давлатии вилоят ва Раёсати КДАМ ҶТ дар ВМКБ баргузор гардида, дар он олимон, ходимони дин ва фаъолони ҷомеа иштирок намуданд.

Бояд зикр намуд, ки дар Паёми навбатии Пешвои миллат муҳтарам Эмомалӣ Раҳмон ба Маҷлиси Олии Ҷумҳурии Тоҷикистон таъкид шудааст, ки «шиддати хатару таҳдидҳои ҷаҳонӣ то ҳанӯз паст нагардидааст. Таҷриба нишон медиҳад, ки бартараф намудани манбаъҳои маблағгузории гурӯҳҳои террористиву экстремистӣ имкон медиҳад, ки таъсири онҳо то андозае аз байн бурда шуда, шомилшавии ҷавонон ба ин гурӯҳҳо пешгирӣ карда шавад».

Бо ёдоварӣ аз ин таъкидҳои Пешвои миллат ректори Донишгоҳи давлатии шаҳри Хоруғ, доктори илмҳои иқтисодӣ, профессор Шермамад Ҷонмамадов изҳор дошт, ки замони бархӯрди тамаддунҳо дар рақобати ҷаҳонӣ моро водор месозад, то барои тарбияи насли солиму созанда, худшиносу худогоҳ аз тамоми имкониятҳо истифода намоем. Зикр гардид, ки танҳо бо риояи ахлоқи ҳамидаи миллӣ ва хиради азалии тоҷикона мо метавонем насли ватандӯсту сазоворро ба воя расонда, шомилшавии ҷавононро ба ҳар гуна гурӯҳу ҳаракатҳои тундрав пешгирӣ намоем.

Муовини аввали раиси ВМКБ Алишер Мирзонаботов мафҳумҳои терроризму экстремизмро шарҳ дода, таъкид дошт, ки аз хатарҳои ҷиддӣ, таҳдиди он ба амнияти кишвар ва оқибатҳои даҳшатбори он бояд ҷомеаи шаҳрвандӣ огоҳӣ дошта бошад. Зикр гардид, ки қонунгузории Ҷумҳурии Тоҷикистон дар самти мубориза бар зидди терроризму экстремизм хеле мукаммал аст. Татбиқи амалии ин қонунгузориҳо ва дар ин замина таъмини амнияти шаҳрвандони Тоҷикистон вазифаи аз ҳама муҳим буда, дар баробари ниҳоду сохторҳои давлатии масъул ҳар як шаҳрванди кишвари соҳибистиқлоламон бояд бо истифода аз ақли солим дар мубориза бар ин зуҳуроти номатлуби ҷаҳонӣ масъулияти ҷиддӣ эҳсос намояд. Ба таъкиди Алишер Мирзонаботов, солҳои охир зиёда аз сад кишвари ҷаҳон ҳадафи амалҳои террористии гурӯҳҳои манфиатхоҳ қарор гирифта, садҳо ҳазор нафар макони зисти худро тарк намудаанд.

Сардори Раёсати КДАМ ҶТ дар ВМКБ Мамадқул Меликов низ андешаҳояшро дар бораи терроризму экстремизм баён дошта, зикр кард, ки ҳадафи асосии ин гурӯҳҳо зарба задан ба сохти давлатдорӣ, заиф гардондани пояҳои бехатарии давлат ва шубҳа андохтан дар миёни мардум аст. Солҳои охир террор бо суиистифода аз террористони худкуш, шаҳид ё фидоиён васеъ паҳн гардида истодааст. Аз он изҳори таассуф карда шуд, ки чунин намуди террор асосан бо ҷалби ҷавонони гумроҳе анҷом дода мешавад, ки бо таъсири мағзшӯӣ шомили гурӯҳҳои террористӣ гардидаанд.

«Дар пешгирии ин падидаи номатлуб саҳми наздикону пайвандон ва ҳамсояҳо калон аст. Зеро агар аҳли ҷомеа сари вақт бо сохторҳои дахлдори давлатӣ ҳамкориро ба роҳ мемонданд, баъзе кирдорҳои хавфноки онҳо пешгирӣ мешуд. Маҳз бетарафии аҳли ҷомеа метавонад барои анҷом додани кирдорҳои ғайриқонунӣ, ҷалб шудани ҷавонон ба гурӯҳҳои тундрав ва халалдор гаштани амнияти давлату миллат аз ҷониби афроди манфиатхоҳ замина гузорад. Сари вақт ба роҳ мондани корҳои фаҳмондадиҳӣ бо ҷалби зиёиён, ҷавонон, занон, олимон, ходимони дин имкон медиҳад, ки ҷавонон аз оқибатҳои даҳшатбори терроризму экстремизм огоҳӣ пайдо намуда, аз шомилшавӣ ба гурӯҳҳои ифротӣ канораҷӯӣ намоянд», -афзуд Мамадқул Меликов.

Дар ҳамоиш инчунин олимон ва ходимони дин ҷиҳати пешгирии шомилшавии ҷавонон ба гурӯҳҳои террористию экстремистӣ, ҷалби онҳо ба корҳои ободонӣ ва ҳифзи арзишҳои миллию дастовардҳои даврони соҳибистиқлолӣ изҳори андеша намуданд.

Февраль 18, 2019 09:15

Хабарҳои дигари ин бахш

Шаҳри Панҷакент ва ноҳияи Шаҳристон нақшаи даъвати тирамоҳиро дар рӯзи аввал иҷро намуданд
ДАЪВАТИ ТИРАМОҲӢ. Дар Хатлон нақшаи даъват ба сафи Қувваҳои Мусаллаҳи Тоҷикистон бори аввал дар рӯзи якум пурра таъмин шуд
Ҷамоатҳои деҳоти Ворух, Чоркӯҳ, Навгилем, Лаккон ва шаҳраки Шуроби шаҳри Исфара нақшаи даъвати тирамоҳиро иҷро намуданд
ХИЗМАТ БА ВАТАН ШАРАФ АСТ! Наваскарони шаҳри Ҳисор ба сафи Қувваҳои Мусаллаҳи Ҷумҳурии Тоҷикистон ҳамроҳ шуданд
ДАР ХАТЛОН НАҚШАИ ДАЪВАТИ ТИРАМОҲӢ ИҶРО ГАРДИД. Дар 11 шаҳру ноҳияи вилоят наваскаронро ба хизмати Ватан гусел намуданд
Мулоқоти ҳамраисони ҳайатҳои ҳукуматии Тоҷикистон ва Қирғизистон оид ба делимитатсия ва демаркатсияи сарҳади давлатӣ доир шуд
Ноҳияҳои минтақаи Рашт нақшаи даъвати ҷавонон ба сафи Қувваҳои Мусаллаҳи Ҷумҳурии Тоҷикистонро пурра иҷро намуданд
Вилояти Мухтори Кӯҳистони Бадахшон нақшаи даъвати тирамоҳии ҷавонон ба сафи Қувваҳои Мусаллаҳи Ҷумҳурии Тоҷикистонро барзиёд иҷро намуд
Дар Душанбе лоиҳаи Қонуни Ҷумҳурии Тоҷикистон «Дар бораи политсия» баррасӣ гардид
Ҷаласаи Шурои ҳамоҳангсозии фаъолияти мақомоти ҳифзи ҳуқуқ ва сохторҳои ҳарбии ҳудуди гарнизони Бохтар баргузор гардид
«ҲАМА БА ХИЗМАТИ ВАТАН ОМОДАЕМ!». Дар Суғд ҳамоиши ҷавонон баргузор гардид
Намояндагони Тоҷикистон дар ҳамоиши Қазоқистон оид ба мубориза бо муомилоти ғайриқонунии воситаҳои нашъадор иштирок намуданд