«Баҳори ҷавонӣ – Наврӯзи ҷаҳонӣ». Дар шаҳри Ҳисор маҳфили наврӯзии ҷавонон баргузор гардид

ДУШАНБЕ, 19.03.2019 /АМИТ «Ховар»/. 18 март бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва дастгирии Мақомоти иҷроияи ҳокимияти давлатии шаҳри Ҳисор дар Ҷамоати деҳоти Навободи шаҳр маҳфили наврӯзии ҷавонони ҷумҳурӣ таҳти унвони «Баҳори ҷавонӣ – Наврӯзи ҷаҳонӣ» баргузор гардид. Дар он зиёда аз 200 нафар ҷавонони фаъол аз тамоми ҷумҳурӣ иштирок намуданд.

Тавре аз Кумитаи кор бо ҷавонон ва варзиш ба АМИТ «Ховар» хабар доданд, зимни  барномаи идона раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Аҳтам Абдуллозода иброз дошт, ки Наврӯз ҷашни қадимаи миллати тоҷик мебошад. Он метавонад дар шароити  мураккаби имрӯза ҳамчун ойини сулҳу оромӣ ва ҳамкориву дӯстӣ ба мардумони олам хизмат намояд. Наврӯз бо обу хок, марзу бум ва рӯҳи тамаддунсози ниёгони мо пайванди азалӣ дошта, он дорои рамзҳое мебошад, ки  аз замонҳои бостонӣ то имрӯз рӯзгори мардуми моро ҳамроҳӣ мекунанд.

«Дар  ин айём табиат эҳё мегардад, инсон неруи нав мегирад.  Дилу  андешаҳо ба ҳам омада, одамон амалҳои саховату накӯкорӣ ва хайру савобро ба ҷо меоранд  ва ба ҳамдигар шодиву сурур мебахшанд»,- гуфт  Аҳтам Абдуллозода.

Ҳамчунин  раиси шаҳри Ҳисор Шарифҷон Ҷумазода иброз  намуд, ки Наврӯз аз зеботарин ҷашнҳои миллии мо – тоҷикон ва дигар мардумони ҳавзаи Наврӯз аст. Он  бо ғояҳои олии башардӯстона — ҳамкорӣ, созандагӣ, ободкорӣ, инсондӯстиву хайрхоҳӣ ва шукргузорӣ мардумро гирди ҳам меорад.

Сипас иштирокчиёни ҷашни наврӯзӣ  аз дастархони идона, намоиши ҳунарҳои мардуми  шаҳри Ҳисор ва намоиши варзишгарон дидан намуда, бо таърих ва ҳунари волои ин минтақа ошноӣ пайдо намуданд.