«БОЗГАШТИ ШУТУРҲОИ САФЕД…». Таҳти ин унвон китоби рӯзноманигори шинохтаи тоҷик ба табъ расид

ДУШАНБЕ, 16.03.2019/АМИТ «Ховар»/.  «Бозгашти шутурҳои сафед…» чунин ном дорад, китоби  тозанашри рӯзноманигори  варзидаи тоҷик Отабек Ғойибов, ки дар остонаи Рӯзи матбуоти тоҷик дар нашриёти «Адиб» ба забони тоҷикӣ нашр гардид.

Қаҳрамони  асосии «Бозгашти шутурҳои сафед…» худи рӯзноманигор аст, ки ҳаётро аз асли хеш меҷӯяд, ба деҳаи худ меҳр дорад, вале барои ҳифзи ҷони чанд оилаи дигар  роҳ меҷӯяд, роҳ меёбад ва ба мақсади худ мерасад. Рӯзноманигор дар ин китоб бо қиссаҳои худ  ҳолатҳои равонии  қаҳрамононашро  хеле возеҳ тасвир  кардааст.  «Бозгашти шутурҳои сафед…» умед, қисса ва рамз буда, дар хоб дидани шутури сафед фоли нек аст.

Китоби «Бозгашти шутурҳои сафед…»  маҷмӯаи навбатии рӯзноманигор Отабек Ғойибов буда,  дар он қиссаи ҳамноми китоб-«Бозгашти шутурҳои сафед…», инчунин повестҳои  «Изтироб», «Кумушбибӣ», ҳикояҳои тозаэҷод –«Кӯрнамак» ва «Шикорчӣ» гирд оварда шудааст.

Рӯзноманигор Отабек Ғойибов аз соли 1993  то имрӯз ба ҳайси муҳаррири варзидаи  бахши ӯзбекии радиои  «Овози тоҷик» фаъолият дорад. Мавсуф барандаи Ҷоизаи Иттифоқи журналистони Тоҷикистон  ба номи Абулқосим Лоҳутӣ дар соли 2010 мебошад.