МАВСИМИ КИШТУКОР: Ба кишоварзони Бадахшон кумаки техникӣ расид
![](https://khovar.tj/wp-content/uploads/2019/03/traktorho-Badahshon.jpg)
ДУШАНБЕ, 23.03.2019. /АМИТ «Ховар»/. Кишоварзони ноҳияҳои вилоят дар остонаи кишту кори баҳорӣ соҳиби боз чаҳор трактори тамғаи “Беларусь» гардиданд. Дар ин бора хабарнигори минтақавии АМИТ «Ховар» иттилоъ медиҳад.
Сардии ҳаво ва боронгариҳо дар ин минтақаи кӯҳсори кишвар имкон намедиҳанд, ки кишту кори баҳориро аз аввали моҳи март оғоз кунанд. Одатан дар бештари ноҳияҳо деҳқонон дар даҳаи аввали моҳи апрел ба корҳои саҳроӣ шуруъ мекунанд. Раиси вилояти зимни тақдими калиди мошинолоти нави кишоварзӣ ба деҳқонон барори кор хоста, баён дошт, ки трактори белорус ба шароити кӯҳистон тобовар буда, ҳатто дар заминҳои пур аз реги кӯҳдоманҳо низ аз он истифода бурдан мумкин аст. Аммо ҳарчӣ бештар дар ҳолати корӣ нигоҳ доштани мошинолоти кишоварзӣ ва самаранок истифода бурдани он ба худи ронандагон вобастагӣ дорад.
Корхонаи воҳиди давлатии «Тоҷикагролизинг» ба мақсади таъмини хоҷагиҳои деҳқонӣ бо таҳҷизоти техникӣ дар ноҳияҳои мурғоб, Ишкошим, Роштқалъа ва Қалъаихум Маркази фурӯши техника (МТС) ташкил намудааст. Дар ин марказҳо тракторҳои тамғаиҳои «МТЗ 82», «Тоҷирон», плуг, испор ва дигар намудҳои мошинолоти соҳаи кишоварзӣ ба тариқи лизинг ба фурӯш баровард мешавад. Ҳамчунин дар ҳамаи ноҳияҳои вилоят Марказҳои хизматрасонии техникӣ фаъолият мекунанд, ки ба таъмири техника ва фурӯши қисмҳои эҳтиётӣ машғул мебошанд.