Қоҳир Расулзода: «Тавсеаи равобити иқтисодии Тоҷикистон ва Россия дар меҳвари сиёсати иқтисодии Ҳукумати Ҷумҳурии Тоҷикистон қарор дорад»

Март 20, 2019 16:40

ДУШАНБЕ, 20.03.2019/АМИТ «Ховар»/. 20 март дар шаҳри Душанбе ҷаласаи 16-уми Комиссияи  байниҳукуматӣ оид ба  ҳамкории  иқтисодӣ байни Ҷумҳурии Тоҷикистон ва Федератсияи  Россия  таҳти ҳамраисии Сарвазири Ҷумҳурии Тоҷикистон Қоҳир Расулзода ва муовини аввали Раиси Ҳукумати Россия, вазири молияи Федератсияи Россия Антон Силуанов баргузор гардид. Дар он муҳимтарин масъалаҳои дурнамои тақвияти ҳамкории иқтисодии Тоҷикистону Россия баррасӣ шуданд.

Хабарнигори АМИТ «Ховар» Марзия Саидзода  иттилоъ медиҳад, ки роҳбарони ҳайатҳо  дар назди иштирокдорони ҷаласа роҷеъ ба ҷараёни татбиқи  Протоколи  ҷаласаи 15-уми  Комиссияи байниҳукуматии Тоҷикистону Россия, вазъи макроиқтисодӣ  дар кишварҳои худ,  инчунин қадамҳои устувор ва нек дар самти  гузаронидани ислоҳоти иқтисодӣ  ва таъсири он ба беҳдошти  фазои сармоягузории ҳарду давлат  гузориш доданд.

Саварзири Тоҷикистон Қоҳир Расулзода афзуд, ки тавсеаи равобити иқтисодию тиҷоратӣ  байни Тоҷикистон ва Россия дар меҳвари сиёсати  иқтисодии Ҳукумати  Ҷумҳурии Тоҷикистон  қарор дорад, зеро ду давлат дар миқёси кишварҳои Иттиҳоди Давлатҳои Мустақил  шарики стратегӣ  буда, Россия то ҳол шарики пешсафи иқтисодии Тоҷикистон боқӣ мемонад. Ҳаҷми гардиши мол байни ду кишвар соли гузашта беш аз 1 миллиард доллари америкоиро ташкил дода, сармояи Россия ба иқтисодиёти Тоҷикистон аз 1,6 миллиард доллари америкоӣ боло рафт. Ҳиссаи савдо бо Россия аз ҳаҷми умумии муомилоти савдои хориҷии Ҷумҳурии Тоҷикистон дар соли 2018-ум  24 фоизро ташкил дод.  Ҳамзамон дар ҷаласа масъалаҳои марбут ба тақвияти робитаҳо дар соҳаҳои  иқтисоду тиҷорат, энергетика, мошинсозӣ, сохтмон ва меъморӣ, нақлиёт ва коммуникатсия, кишоварзӣ, тандурустӣ, сайёҳӣ, илму маориф, фарҳанг  ва соири масъалаҳои тавсеаи ҳамкории иқтисодӣ матраҳ гардиданд.

Дар анҷом Протоколи ҷаласаи 16-уми  Комиссияи байниҳукуматӣ оид ба ҳамкории иқтисодӣ байни Ҷумҳурии Тоҷикистон ва Федератсияи Россия, инчунин Меморандум оид ба ҳамкорӣ байни Шӯрои  тиҷоратии Тоҷикистону Россия ба имзо расонида шуданд.

Дар анҷом Сарвазири Ҷумҳурии  Тоҷикистон ва  муовини аввали Раиси Ҳукумати Россия, вазири молияи Федератсияи Россия Антон Силуанов барои намояндагони воситаҳои ахбори омма изҳороти муштарак роҷеъ ба ҷаласаи 16-уми Комиссияи байниҳукуматӣ  баён карданд. Аз ҷумла,  Сарвазири Ҷумҳурии Тоҷикистон Қоҳир Расулзода изҳор дошт,  ки «дар маҷмӯъ оид ба ҷамъбасти натиҷаҳои ҷаласаи Комиссияи байниҳукуматӣ аз рӯи тамоми масъалаҳои рӯзномаи ҷаласа мо ба мувофиқа расидем.  Дар бахши иқтисодиёт ба тамоми вазорату идораҳои ҳарду ҷониб супориш дода шуд, ки ҷиҳати фароҳам овардани шароити мусоид барои сармоягузории мутақобила дар иқтисодиёти Ҷумҳурии Тоҷикистон тадбирҳои иловагӣ андешанд, инчунин таъмини имкониятҳои баробар ва фароҳам овардани шароити мусоидро  барои рақобатпазирии солими субъектҳои хоҷагидор, ки  дар қаламрави ҳарду давлат ба қайд гирифта шудаанд, фароҳам оваранд.  Ҳамзамон қарорҳои дахлдор барои дар оянда фаъол намудани ҳамкории дуҷониба дар соҳаҳои  энергетика, кишоварзӣ, саноати истихроҷ ва истеҳсолот, нақлиёт, технологияҳои иттилоотӣ, алоқа, молиявию қарзӣ қабул карда шуданд».

Муовини аввали Сарвазири Россия, Вазири молияи Федератсияи Россия Антон Силуанов зикр кард, ки Тоҷикистон ва Федератсияи Россия  шарикони стратегӣ маҳсуб  ёфта, дар асоси ин муносибот  дар ҷаласаи Комиссияи байниҳукуматӣ ҳамкорӣ дар бахшҳои иқтисодӣ ва фарҳангӣ баррасӣ  гардиданд. «Воқеан дар ҷараёни кори Коммиссияи байниҳукуматӣ маҷмӯи масъалаҳои марбут ба соҳаҳои энергетика, кишоварзӣ, саноат, фарҳанг баррасӣ гардида, дигар масъалаҳо роҳи ҳалли худро пайдо карданд», -афзуд Антон Силуанов.

«Аз ҳама муҳим, дар ҷараёни ҷаласаи 16-уми Комиссияи байниҳукуматӣ оид ба ҳамкории иқтисодӣ  байни Ҷумҳурии Тоҷикистон ва Федератсияи Россия мо масъалаҳоеро матраҳ намудем, ки дар   мулоқоти Сарони ҳар ду давлат 17 апрели соли равон дар  шаҳри Москва баррасӣ мешаванд.  Инчунин дар самти омодагӣ ҷиҳати ба имзо расонидани як зумра созишномаҳои байниҳукуматӣ ва байнидавлатӣ оид ба масъалаҳои калидӣ ба мувофиқа расидем. Дар ин самт  ба вазорату идораҳои марбутаи ҳарду кишвар дастур дода шуд»,- гуфт дар анҷом Антон Силуанов.

Март 20, 2019 16:40

Хабарҳои дигари ин бахш

Губернатори Ҳукумати мардумии музофоти Шэнсии Чин бо фаъолияти Минтақаи озоди иқтисодии «Данғара» шинос шуд
Тоҷикистон дар муборизаи байналмилалӣ барои ҳифзи бабри барфӣ саҳм мегузорад
МАСЛИҲАТИ МУТАХАССИС. Норасоии намӣ ба решаи дарахтон самаранокии боғотро паст мекунад
Густариши ҳамкории вилояти Хатлон бо музофоти Шэнсӣ баррасӣ шуд
Дар Душанбе ҳамкории иқтисодӣ ва татбиқи лоиҳаҳои муштараки Тоҷикистону Чин баррасӣ гардид
РӮЗИ ҶАҲОНИИ БЕХАТАРИИ ОЗУҚАВОРӢ. Бо мақсади таъмини бехатарии маҳсулот дар Тоҷикистон 14 озмоишгоҳ фаъолият дорад
Сарфаи неруи барқ танҳо вазифаи давлатӣ нест, балки масъулияти ахлоқии ҳар як шаҳрванди мамлакат аст
«IMPERIУA TECHSTREAM — 2025». Дар Душанбе барои наврасон нахустин озмуни технологияҳои иттилоотӣ баргузор гардид
РӮЗИ БАЙНАЛМИЛАЛИИ МУҲИТИ ЗИСТ. Баҳодур Шерализода: «Ҷомеаи ҷаҳон Тоҷикистонро ҳамчун давлати ташаббускор дар соҳаи обу иқлим ва ҳифзи пиряхҳо эътироф намудааст»
Бонки рушди Созмони ҳамкории Шанхай таъсис дода мешавад
Байни Тоҷикистон ва Қирғизистон Протокол оид ба мубодилаи маълумоти пешакии гумрукӣ дар бораи интиқоли молу воситаҳои нақлиёт ба имзо расид
Ҷаласаи 80-уми Шурои роҳбарони хадамотҳои гумруки давлатҳои иштирокдори Иттиҳоди Давлатҳои Мустақил баргузор гардид