Ҷоми КФО: доварони бозии байни дастаҳои «Истиқлол» ва «Хуҷанд» муайян шуданд

ДУШАНБЕ, 19.03.2019. /АМИТ «Ховар»/.  Конфедератсияи футболи Осиё  доварони бозии байни дастаҳои «Истиқлол»-и Душанбе ва «Хуҷанд»-и Хуҷандро дар даври аввали бозиҳои гурӯҳи «Д» -и Ҷоми КФО муайян кард. Ин вохӯриро доварон аз кишвари Шри-Ланка ҳакамӣ мекунанд.

Ҳамин тавр, 3 апрел дар Варзишгоҳи марказии шаҳри Душанбе довари ФИФА Гамини Нивон Робеш «Истиқлол» ва «Хуҷанд»-ро ба ҳайси довари асосӣ ба майдон мебарорад. Ба ӯ  Веллабад  Ниваҷ  Дон Санҷиҷ Премалал ва Локу Кастботе  Иран Удайякант ҳачун ёвар ва Ҳанна Хатоб аз Сурия ба ҳайси довари эҳтиётӣ кӯмак мерасонанд. Нозири доварон Рустам Юсуф Мирзо аз Арабистони Саудӣ ва  комиссар Субраманиан Маникам аз Малайзия таъйин шудаанд.

Гамини Нивон Робеш аз соли  2010 ба узвияти доварони ФИФА пазируфта шудааст. Дар ин муддат ӯ 53 бозии байналмилалиро ҳакамӣ карда, ба дарвозаи дастаҳо 14 зарбаи пеналти таъйин кардааст ва ба  бозингорон 11 корти сурх ва 154 корти зард раво донистааст. Соли гузашта Робеш ба ҳайси довари асосии вохӯрии байни дастаҳои  «Хуҷанд» ва  «Аҳал» (0:2) дар даври плей-оффи Ҷоми КФО масъулият дошт. Дар баробари ин вохӯрии «Истиқлол» ва «Серес Негрос»-ро (4:0) дар бозии нимниҳоии байниқитъавии Ҷоми КФО-2017 ҳакамӣ кардааст.

Вохӯрии байни дастаҳои «Истиқлол» (Душанбе) ва «Хуҷанд» (Хуҷанд)  3 апрел, соати 19:00, дар доираи даври аввали бозиҳои гурӯҳи «Д» дар Варзишгоҳи марказии шаҳри Душанбе гузаронида мешавад.