Шариф Назарзода: «Содиршавии ҷиноятҳои вазнин дар пойтахти мамлакат коҳиш меёбад»

Апрель 19, 2019 09:50

ДУШАНБЕ, 19.04.2019 /АМИТ «Ховар»/. Бо ташаббуси Раёсати Вазорати корҳои дохилӣ дар шаҳри Душанбе ва Мақомоти иҷроияи ҳокимияти давлатии шаҳри Душанбе дар Маҷмааи тандурустии «Истиқлол» вобаста ба тарғиби тарзи ҳаёти солим, пешгирии амалу кирдорҳои номатлуб дар ҷомеа, махсусан норасоиву камбудиҳо дар соҳаи тандурустӣ ва гирифторшавии шаҳрвандон ба бемориҳои гуногун бо кормандони соҳаи тандурустӣ суҳбати озод баргузор гардид.

Тавре аз Раёсати Вазорати корҳои дохилӣ ба мухбири АМИТ «Ховар» хабар доданд, дар вохӯрӣ муовини якуми Вазири тандурустӣ ва ҳифзи иҷтимоии аҳолии Ҷумҳурии Тоҷикистон Саида Умарзода, муовини Раиси шаҳри Душанбе Мавсума Муинӣ, сардори Раёсати ВКД дар шаҳри Душанбе Шариф Назарзода ва роҳбарони тамоми муассисаҳои соҳаи тандурустӣ, беморхонаҳо, марказҳои саломатӣ ва дигар масъулини соҳаи тандурустии пойтахт ширкат намуданд.

Дар мулоқот муовини Раиси шаҳри Душанбе Мавсума Муинӣ иброз дошт, ки имрӯз бо сиёсати хирадмандонаи Президенти Ҷумҳурии Тоҷикистон ва заҳматҳои шабонарӯзии Раиси шаҳри Душанбе маркази Тоҷикистон торафт зебову шукуфон гашта, барои сокинонаш шароити хуби фаъолият ва зиндагии осоишта фароҳам гардидааст. Имрӯзҳо дар тамоми соҳаҳои иҷтимоии аҳолӣ, махсусан соҳаи тандурустӣ бо ба истифода додани биноҳои замонавии марказҳои саломатӣ ва ворид гардидани таҷҳизоти беҳдошти муосир тибби тоҷик пеш меравад.

Дар мулоқот сардори Раёсати ВКД дар шаҳри Душанбе Шариф Назарзода доир ба масъалаҳои мубориза бар зидди таҳдиду хатарҳои ҷаҳони муосир, тақвияти корҳои фаҳмондадиҳӣ ҷиҳати ҳифзи арзишҳои миллӣ, таърихиву фарҳанг ва худшиносиву худогоҳӣ, пешгирии содиршавии кирдорҳои зиддиҳуқуқии ҷавонон, аз ҷумла ба рафтори ноболиғону хонандагони муассисаҳои таълимӣ мусоидаткунанда, муноқиша ва авбошиҳои гурӯҳӣ, муборизаи дастаҷамъона бурдан бар зидди ҷиноятҳои ахлоқӣ ва бемориҳои сироятии аз ин роҳ бавуҷудоянда, истифодаи ваколатҳои табибону духтурон ва кулли кормандони соҳаи тандурустӣ ҳамчун табақаи пешсафи ҷомеа дар бунёди муҳити ҷомеаи солим ҳарф зад.

Шариф Назарзода иброз дошт, ки «аз ҷониби Раиси шаҳри Душанбе таҳия ва қабул гардидани қарор «Дар бораи таъсис додани гурӯҳи таблиғотӣ оид ба тарғиби одоби шаҳрнишинӣ, густариши корҳои ободонӣ, баланд бардоштани маърифати ҳуқуқии сокинони шаҳри Душанбе» ва ташкили гурӯҳҳои корӣ дар доираи амалиёти маърифативу профилактикии «Одоби шаҳрнишинӣ» саривақтӣ ва бамаврид мебошанд. Давоми соли охир дар натиҷаи татбиқи он вазъи ҷинояткорӣ дар тамоми самтҳо тамоюли камшавӣ дошта, содиршавии ҷиноятҳои вазнин ва махсусан вазнин низ бамаротиб дар пойтахти кишвар коҳиш ёфта истодааст».

Дар анҷоми мулоқот иброз гардид, ки баргузории чунин вохӯриву суҳбатҳои озод ба пешгирии амалу кирдорҳои номатлуб дар ҷомеа, баланд гардидани маърифати ҳуқуқиву шаҳрдории сокинони пойтахт, ҳамзамон решакан намудани кирдорҳои ғайриахлоқӣ дар байни шаҳрвандон ва норасоиву камбудиҳои соҳа мусоидат менамояд.

Апрель 19, 2019 09:50

Хабарҳои дигари ин бахш

Вазири мудофиаи Тоҷикистон дар Машварати навбатии вазирони мудофиаи давлатҳои аъзои Созмони ҳамкории Шанхай иштирок намуд
Вазири адлияи Тоҷикистон дар ҷаласаи нуздаҳуми Шурои вазирони адлияи давлатҳои аъзои ИДМ иштирок намуд
АРТИШИ МИЛЛӢ НА ТАНҲО ҚУДРАТИ ҲАРБӢ, БАЛКИ РАМЗИ ВАҲДАТ АСТ. Андешаҳои Вазири мудофиаи Ҷумҳурии Тоҷикистон дар ин мавзуъ
Котиби Шурои амнияти Тоҷикистон дар Вохӯрии 20-уми котибони шуроҳои амнияти давлатҳои аъзои СҲШ дар Пекин иштирок намуд
Қочоқи калони маводи мухаддир дар сарҳад бо Афғонистон пешгирӣ карда шуд
Дар ноҳияи Мир Саид Алии Ҳамадонӣ қочоқи беш аз 90 кг маводи мухаддир пешгирӣ гардид
Дар Хатлон гурӯҳи ҷиноятии фаромиллӣ бо 102 кг маводи нашъаовар дастгир шуд
Юсуф Раҳмон дар ҷаласаи навбатии Кумитаи Котибони шуроҳои амнияти давлатҳои аъзои СААД ва Вохӯрии дуюми Котибони шуроҳои амнияти Осиёи Марказӣ-Русия иштирок намуд
Намояндаи Тоҷикистон дар ҷаласаи Кумитаи амнияти САҲА дар Вена иштирок намуд
Дар шаҳри Турсунзода 70 кг маводи нашъаовар мусодира карда шуд
Дар вилояти Хатлон тақрибан 179 кг маводи нашъаовар мусодира ва гурӯҳи муташаккили фаромиллии қочоқбарон боздошт гардид
Дар Қазоқистон ҷаласаи роҳбарони воҳидҳои криминалии вазоратҳои корҳои дохилии ИДМ баргузор гардид