«ТАМҒАИ ПИСАНДИДАИ ТОҶИКИСТОН-2019». Ғолибон мукофотонида мешаванд

ДУШАНБЕ, 30.04.2019 /АМИТ «Ховар»/. 4 май дар шаҳри Душанбе дар вазъияти тантанавӣ ба ғолибони озмуни «Тамғаи писандидаи Тоҷикистон-2019», ки ҷамъбаст гардид, дипломҳо ва ҳайкалчаҳои озмун тақдим карда мешаванд. Озмуни мазкур дар доираи лоиҳаи «Тамғаи писандидаи Тоҷикистон-2019», ки аз ҷониби агентии рекламавии «Тайрон» ташкил карда шуд, баргузор гардид.

 Бояд зикр кард, ки озмун маротибаи 6-ум дар Тоҷикистон баргузор шуда, дар ин давра дар он зиёда аз 150 корхонаву ширкатҳои ватанӣ иштирок намудаанд. Соли равон дар ин озмун беш аз 30 корхонаву ширкатҳои хурду бузург аз минтақаҳои гуногуни ҷумҳурӣ, ки дар соҳаҳои истеҳсолот, савдо ва хизматрасонӣ фаъолият менамоянд, ширкат варзиданд. Истеъмолкунандагон аз рӯи 25 номинатсия ба  тамғаи писандидаи худ овоз доданд. Тақрибан 30 ҳазор нафар тамғаи писандидаи худро дастгирӣ карданд.

Мақсад аз татбиқи ин лоиҳа дастгирии истеҳсолкунандагони ватанӣ ва тарғиби маҳсулоти  онҳо  дар кишвар ва берун аз он мебошад.

Илова бар ин, дар доираи лоиҳа 1, 2, 3 ва 4 май дар Маҷмааи давлатии «Кохи Борбад»-и пойтахт намоиш-фурӯши маҳсулоти зиёда аз 30 корхонаи  истеҳсолӣ ва ширкатҳои хизматрасону савдо аз шаҳру ноҳияҳои  ҷумҳурӣ баргузор мегардад.

Дар маросими ифтитоҳи намоишгоҳ намояндагони вазорату идораҳо, Палатаи савдо ва саноати Ҷумҳурии Тоҷикистон ва корхонаҳои саноатии кишвар иштирок менамоянд.

Дар намоишгоҳ доираи васеи маҳсулоти озуқаворӣ ва ашёи хонагӣ ба маъраз гузошта мешаванд. Меҳмонон имкон доранд, ки дар баробари шиносоӣ бо намудҳои гуногуни маҳсулот, ҳамчунин бо нархи арзон онҳоро харидорӣ намоянд.