Ҷавонон бояд амнияти давлат ва шарафу номуси ватандориро ҳимоя намоянд

 ДУШАНБЕ, 23.05.2019 /АМИТ «Ховар»/. Имрӯз  дар Китобхонаи миллии Тоҷикистон конфронси  илмӣ-назарявӣ таҳти унвони «Пешвои миллат ва нақши мо ҷавонон, дар пайравӣ аз ӯ» доир гардид. Дар он намояндагони Дастгоҳи иҷроияи Президенти Ҷумҳурии Тоҷикистон, Маҷлиси намояндагони Маҷлиси Олии Ҷумҳурии Тоҷикистон, роҳбарони вазорату идораҳои дахлдор, ректорони муассисаҳои таҳсилоти олии касбӣ, ҷоизадорони ба номи Исмоили Сомонӣ, гирандагони стипендияи Президентӣ ва шаҳрӣ, олимону муҳаққиқони ҷавон, волонтёрон ва ҷавонони фаъоли кишвар иштирок намуданд.

Дар оғоз муовини якуми Кумитаи кор бо ҷавонон ва варзиши назди Ҳукумати Ҷумҳурии Тоҷикистон Ризо Назарзода  сухан карда, ҳозиринро ба Рӯзи ҷавонони Тоҷикистон табрик намуд ва иброз дошт, ки ҳамасола дар сатҳи баланди ҷамъиятиву сиёсӣ таҷлил гардидани Рӯзи ҷавонон шаҳодати ғамхориҳои пайвастаи давлату Ҳукумат нисбат ба насли ҷавони кишвар мебошад. Ҳар тадбире, ки дар мамлакат амалӣ карда мешавад, пеш аз ҳама, барои беҳбудии ҳаёти ҷавонон ва ояндаи неки Тоҷикистон нигаронида шудааст.

Ҳамчунин ҳозирин аз таваҷҷуҳи бевоситаи Ҳукумати мамлакат ва Пешвои миллат нисбат ба ҷавонон сухан карда, зикр намуданд, ки ҷавонон бояд аз ҳама қишрҳои ҷомеа бештар фаъол бошанд. Ташаббусҳои созанда пешниҳод намоянд, рамзҳои давлатӣ, муқаддасоти миллӣ ва дастовардҳои истиқлолиятро ҳифз кунанд.  Дар  ҳаёти сиёсиву иҷтимоии Тоҷикистон бо дасту дили гарм ва неруи бунёдгарона ширкат варзида, амнияти давлат ва шарафу номуси ватандориро ҳимоя намоянд.