«БЕ СИТОРА НЕСТАМ…». Таҳти чунин унвон китоби нави Шоираи халқии Тоҷикистон Зулфия Атоӣ ба нашр расид

ДУШАНБЕ, 01.05.2019. /АМИТ «Ховар»/. Нашриёти «Истеъдод» китоби нави Шоираи халқии Тоҷикистон Зулфия Атоиро зери унвони «Бе ситора нестам…» ба табъ расонд. 

Тавре мухбири АМИТ «Ховар» хабар медиҳад, китоби мазкур аз назму наср иборат буда, дар боби аввали он «Ба ҷои сарсухан» пораҳое аз мукотиботи устод Мирзо Турсунзода, Муъмин Қаноат, Лоиқ, Гулназар, Гулчеҳра Сулаймонӣ, Усмон Назир, Ҳамроқул Шодиқулов оварда шудаанд.

Дар китоб шеърҳои нав, ҳикояву резаҳикоя, ёддошту хотираҳо, маводи адабию журналистӣ ва назмӣ доир ба шахсият ва эҷодиёти адиба гирд оварда шудаанд.

«Китоб аз он сабаб «Бе ситора нестам…» унвон гирифтааст, ки нахуст, ситораи ҳамноми шоира дар кайҳон –«Ахтари зулф» зери назар аст. Дуюм, муаллиф гуфтан мехоҳад, ки ман бо ситораам, яъне хушбахт ҳастам», — оварда шудааст дар оғози китоб.

Ёдрас мешавем, ки ба шарафи Шоираи халқии Тоҷикистон Зулфия Атоӣ ба ситорае дар кайҳон  номи «Зулф» дода шудааст.

Ситораи мазкурро Маркази омӯзиши ҷирмҳои осмонии Лондони Англия 15 июн – дар зодрӯзи шоираи тоҷик таҳти рақами 25290¬_415 ба қайд гирифта, тулӯи мустақимашро дар бурҷи Gemini 06H06m48.66s ва тамоилашро 23 ◦38’18.97 муайян намуда буд.

Бояд гуфт, ки Зулфия Атоӣ аз зумраи адибаҳои маъруфи тоҷик буда, шеърҳояш ба забонҳои русӣ, ӯзбекӣ, қазоқӣ, украинӣ, беларусӣ, туркманӣ, гурҷӣ, франсузӣ, немисӣ, англисӣ ва ғайра тарҷума ва  интишор шудаанд.

Зулфия 15 июни соли 1954 дар деҳаи  Қалъаи Азими ноҳияи  Ғончӣ  дар хонаводаи  омўзгор  чашм  ба олами  ҳастӣ кушодааст. Соли 1970 ба факултаи  забон ва адабиёти  Универститети давлатии Тоҷикистон дохил шуда, пас аз соле барои  таҳсил ба шаҳри  Москва рафт ва дар бахши назми Институти  адабии ба номи М. Горкий ба таҳсил оғоз намуд.

Соли 1977 баъди  хатми Институти  адабӣ ба шаҳри  Душанбе  омада, то соли 1983 дар рўзномаи «Тоҷикистони советӣ» ( ҳоло «Ҷумҳурият») ба  рӯзноманигорӣ  машғул гашт.

Мавсуф аз соли 1983 то соли 1985 дар маҷаллаи  «Занони Тоҷикистон» (ҳоло «Фирўза») ба ҳайси мудири шуъба, аз соли 1985 то соли 1990 дар ҳафтаномаи «Омўзгор» ҳамчун муовини сардабир фаъолият кардааст. Аз  соли 1993 сардабири Муассисаи  давлатии маҷаллаи бонувон «Фирўза» буд.

Аз соли 1979 узви Иттифоқи нависандагони Тоҷикистон  аст. Соли 2010 ба унвони Шоири халқии  Тоҷикистон  сазовор гардид.

Шоираи тоҷикро соли 2011 барои  саҳми  арзанда дар густариши робитаҳои адабии Тоҷикистону Россия бо ордени  «Дили Данко» сазовор донистанд. Ӯ ҳамчунин узви ифтихории  Академияи  байналхалқии  фарҳанг, илм ва  тиҷорати Санкт-Петербург интихоб гардидааст.

Зулфия Атоӣ дар сафи  аҳли  адабиёту фарҳанг ба кишварҳои   Покистон, Россия, Украина, Голландия, Германия, Гурҷистон, Амрико,  Қазоқистон,  Қирғизистону Туркманистон сафари эҷодӣ  анҷом додааст.

Зулфия Атоӣ барандаи  Ҷоизаи  Созмони ҷавонони ҷумҳурӣ (1995) мебошад. Соли 1997 бо ордени «Шараф» мукофотонида шудааст. Аълочии  маориф  ва матбуоти Ҷумҳурии Тоҷикистон  мебошад.

Соли 2005 ба Ҷоизаи   Иттифоқи журналистон ба номи А. Лоҳутӣ сазовор дониста шудааст.