«ДАРВОҚЕЪ, ТОҶИКИСТОН БИҲИШТИ РЎИ ЗАМИН БУДААСТ», — Раиси Шўрои Аврупо Доналд Туск таассуроташро аз сафари Тоҷикистон баён медорад

ДУШАНБЕ, 31.05.2019. /АМИТ «Ховар»/. «Табиати дилфиреби Тоҷикистон  воқеан маро дар ҳайрат гузошт. Ҳеҷ тасаввур карда наметавонистам, ки Тоҷикистон дорои чунин мавзеъҳои зебою дилрабост. Дарвоқеъ, Тоҷикистон биҳишти рўи замин будааст»,- чунин иброз дошт Раиси Шўрои Аврупо Доналд Туск пас аз боздид аз Кохи бонувон ва истироҳатгоҳи «Чорчаман»-и ноҳияи Дарвоз, ки дар доираи сафари расмияш ба Тоҷикистон, 30 май сурат гирифт.

Ӯ табиати биҳиштосои Тоҷикистон дар мусоҳиба бо «Телевизиони Тоҷикистон» васф карда, мегӯяд: «Инро вақте эҳсос мекунӣ, ки аз наздик ин кишвари афсонавиро мебинӣ. Пӯшида нест, дар ҳаяҷонам, намедонам чӣ гуна Тоҷикистонро тасвир кунам, зеро зебогиаш мафтунам кардааст».

Ёдовар мешавем, ки дар Кохи бонувон фаъолият ва маҳсули дастранҷи ҳунармандон муаррифӣ карда шуд.

Дар ин макон занону духтарон бо истифода аз муосиртарин таҷҳизоти соҳавӣ ба дӯхтани сару либоси миллӣ, мактабӣ, тиббӣ ва дигар маҳсулоти зарурӣ машғул мебошанд.

Дар истироҳатгоҳи «Чорчаман» бошад, намоиши ҳунарҳо, хўрокҳои миллӣ ва дастранҷи сокинони ин ноҳияи кӯҳистони мамакат ташкил гардида буд.