Кумитаи давлатии сармоягузорӣ ва идораи амволи давлатӣ аз фаъолияти ин мақомот дар 10 соли охир натиҷагирӣ кард

ДУШАНБЕ, 21.05.2019/АМИТ «Ховар»/. Иҷрои дастуру супоришҳои  Асосгузори сулҳу ваҳдати миллӣ- Пешвои миллат,  Президенти Ҷумҳурии Тоҷикистон муҳтарам Эмомалӣ Раҳмон  дар вохӯрӣ бо кормандони мақомоти молия, андоз, гумрук, сармоягузорӣ ва бонкҳои мамлакат  10 майи соли равон дар ҷаласаи васеи кормандони дастгоҳи марказӣ ва сохторҳои зертобеи Кумитаи давлатии сармоягузорӣ ва идораи амволи давлатии Ҷумҳурии Тоҷикистон натиҷагирӣ гардид.

Раиси Кумита Фаррух Ҳамрализода гуфт, ки ҳадафи ҷаласаи васеъ  арзёбии  фаъолияти Кумита дар зарфи даҳ соли охир ва  иҷрои супоришҳои Сарвари давлат  дар вохӯрии мазкур мебошад.

Бояд зикр кард, ки  супоришҳои  Пешвои миллат муҳтарам Эмомалӣ Раҳмон   дар самти беҳтарсозии фазои мусоиди сармоягузориву соҳибкорӣ, ҷалби бештари сармояи мустақими хориҷӣ, ислоҳ ва бартараф намудани камбудиҳои ҷойдошта, инчунин дарёфти роҳҳои ҳалли мушкилот барои ба роҳ мондани низоми нави электронии фаъолият, ҷорӣ кардани технологияи муосир, интихобу ҷобаҷогузории кадрҳои баландихтисоси соҳа, таҳияву татбиқи қонунҳо ва барномаҳои давлатӣ мебошанд. Таъкид гардид, ки  масъалаҳои зикргардида барои рушди минбаъдаи иқтисоди миллии ҷумҳурӣ муҳим мебошад.

Ҳамзамон  бо мақсади иҷрои супоришҳои дар боло зикргардида, аз ҷониби Кумита Нақшаи чорабиниҳо тартиб дода шуда, дар асоси он барои иҷрои бандҳои марбута масъулини соҳа  вазифадор гардиданд.

Дар анҷоми ҷаласа  Фаррух Ҳамрализода баҳри иҷрои дастуру супоришҳои  Президенти  мамлакат  муҳтарам Эмомалӣ Раҳмон ба роҳбарони дастгоҳи марказӣ ва сохторҳои зертобеи  Кумита супоришҳои мушаххас доданд.