Кумитаи иҷроияи ҲХДТ дар ноҳияи И.Сомонӣ даври дуюми озмуни «Забон донӣ – ҷаҳон донӣ»-ро ҷамъбаст кард

Май 8, 2019 13:30

ДУШАНБЕ, 08.05.2019. /АМИТ «Ховар»/. Кумитаи иҷроияи Ҳизби Халқии Демократии Тоҷикистон /ҲХДТ/ дар ноҳияи Исмоили Сомонӣ даври дуюми озмуни беҳтарин забондонро таҳти унвони «Забон донӣ – ҷаҳон донӣ», ки аз ҷониби Кумитаи иҷроияи ҲХДТ дар шаҳри Душанбе дар ҳамбастагӣ бо Донишкадаи давлатии забонҳои Тоҷикистон ба номи Сотим Улуғзода миёни донишҷӯёни донишгоҳу донишкадаҳои олӣ ва коллеҷу литсейҳои ҳудуди шаҳри Душанбе гузаронида мешавад, бо иштироки муҳассилини муассисаҳои таҳсилоти миёна ва олии касбии ноҳияи мазкур дар сатҳи баланди ташкилӣ ҷамъбаст намуд. Дар ин бора АМИТ «Ховар» бо истинод ба Кумитаи иҷроияи ҲХДТ дар ноҳияи Исмоили Сомонӣ хабар медиҳад.

Тибқи баҳогузории ҳайати ҳакамони озмун, аз миёни 21 нафар иштирокдорони даври дуюм донишҷӯи Донишгоҳи давлатии омӯзгории Тоҷикистон ба номи С. Айнӣ Розия Ғарибмаҳмадова ҷойи аввал, донишҷӯёни Донишгоҳи давлатии омӯзгории Тоҷикистон ба номи С. Айнӣ Элзира Ҷумаева ва Дурдона Тағаева ҷойи дуюм, донишҷӯи Донишгоҳи славянии Россияву Тоҷикистон Дилноза Азимова, донишҷӯи Донишкадаи идоракунии давлатии назди Президенти Ҷумҳурии Тоҷикистон Маҷид Ҳамидов ва донишҷӯи филиали Донишгоҳи давлатии Москва ба номи М.В Ломоносов Бунафша Рабиева ҷойи сеюмро сазовор гашта, ба даври минбаъда роҳхат гирифтанд.

Ёдовар мешавем, ки озмуни мазкур бо мақсади дарёфти чеҳраҳои забондон, тарғиби омӯзиши забонҳои хориҷӣ ва ҳавасманд гардонидани донишҷӯён ба забондонӣ, инчунин дар заминаи дастуру супоришҳое, ки зимни Паёми навбатии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, Раиси муаззами Ҳизби Халқии Демократии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон ироа гардиданд, гузаронида мешавад.

Озмун аз се давр иборат буда, даври аввал аз 1 то 16 апрел аз ҷониби муассисаҳои таълимӣ миёни довталабон ва даври дуюм аз 20 апрел то 6 май аз ҷониби кумитаҳои иҷроияи ноҳиявии ҳизб миёни ғолибони даври аввал гузаронида шуд. Даври сеюми он аз 7 то 17 майи соли 2019 аз ҷониби Кумитаи иҷроияи шаҳрии ҳизб миёни ғолибони даври дуюм гузаронида мешавад.

Тибқи Низомномаи озмун, ғолиби ҷойи якум – як нафар, ҷойи дуюм — ду нафар ва ҷойи сеюм — се нафар муайян карда мешаванд. Ба ғолибони ҷойи якум 250 сомонӣ, ҷойи дуюм 200 сомонӣ ва ҷойи сеюм 150 сомонӣ бо идрорпулии (стипендияи) Кумитаи иҷроияи ҲХДТ дар шаҳри Душанбе то 6 моҳ (шурӯъ аз моҳи сентябри соли 2019) дода мешавад. Инчунин ғолибони озмун дар арафаи Рӯзи ҷавонони Тоҷикистон бо Ифтихорномаю Сипоснома ва туҳфаҳои хотиравии Кумитаи иҷроияи шаҳрии ҳизб сарфароз гардонида мешаванд.

Май 8, 2019 13:30

Хабарҳои дигари ин бахш

Китобҳои ноширони тоҷик ба Намоишгоҳи байналмилалии «Китоби Абузабӣ» пешниҳод шуданд
Ҳунарманди халқии Тоҷикистон Асланшоҳ Раҳматуллоев аз олам даргузашт
«ДАСТХАТҲОИ ҚАЛЪАИ МУҒ». Нодиртарин ёдгориҳои Тоҷикистон ба рӯйхати «Ҳофизаи ҷаҳонӣ»-и созмони ЮНЕСКО дохил гардиданд
Дар Тоҷикистон ҳунари балети Узбекистон муаррифӣ карда мешавад
Дар Ҷумҳурии Мардумии Чин Рӯзҳои фарҳанги Ҷумҳурии Тоҷикистон оғоз гардид
Дар шаҳри Панҷакент Боғи фарҳангию фароғатии ба номи Абулқосим Фирдавсӣ бунёд карда мешавад
«УМРЕ БО МУСИҚӢ». Дар Душанбе ҳамоиши илмӣ баргузор гардид
Ба гиромидошти асосгузори мактаби классикии шеър-мусиқии замони Сомониён Абулаббоси Бахтиёр симпозиуми байналмилалӣ доир шуд
Дар Ҳисор маҳфил-озмуни «Шоҳнома Ватан аст!» оғоз гардид
Директори Хадамоти федералии приставҳои судии Федератсияи Русия бо таъриху тамаддуни тоҷикон шинос шуд
Дар Китобхонаи миллӣ даври аввали озмуни «Фурӯғи субҳи доноӣ китоб аст» баргузор гардид
Дастхатҳои Қалъаи Кӯҳи Муғ ба рӯйхати «Ҳофизаи ҷаҳонӣ»-и ЮНЕСКО дохил шуданд