«ТАҲСИЛИ ФАРОГИР: МАКТАБ БАРОИ ҲАМА». Дар шаҳри Хоруғ дар ин мавзӯъ ҳамоиши минтақавӣ баргузор гардид

Май 29, 2019 08:56

ХОРУҒ, 29.05.2019 /АМИТ «Ховар»/.  Соли 2018  Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон  муҳтарам Эмомалӣ Раҳмон ба Конвенсияи Созмони Милали Муттаҳид  оид ба шахсони  оризаи ҷисмонӣ дошта имзо гузоштанд. Ба ин муносибат дар шаҳри Хоруғ,   дар  толори Донишгоҳи Осиёи Марказӣ  бо иштироки  намояндагони соҳаҳои маориф, тандурустӣ, ҳифзи иҷтимоӣ ва ташкилотҳои ҷамиятӣ аз шаҳру ноҳияҳои ҷумҳурӣ, коршиносони созмонҳои байналмилалӣ дар мавзӯи «Таҳсили фарогир: Мактаб барои ҳама» ҳамоиши минтақавӣ баргузор гардид.

Дар ҳамоиш ҳамчунин волидони фарзандони дорои имконияташон маҳдуд низ ҳузур доштанд.

Ба гуфтаи роҳбари ташкилоти ҷамъиятии «Рушди инклюзив» аз шаҳри Душанбе  Зайнура Набиева, расидагӣ ба ҳалли  мушкилоти кӯдакони имконияташон маҳдуд танҳо вазифаи мақомоти  иҷроияи ҳокимияти давлатии шаҳру ноҳияҳо нест, балки ба зиндагии оддӣ ва бе ҳарос баргардонидани ин қишри ҷомеа рисолати ҳар фарди ҷомеа мебошад.

«Тарбияи ин кӯдакон низ аз рӯзи таваллуд оғоз мешавад ва онҳо дар баробари дигар ҳамсолони худ бояд ба боғча -яслӣ, маҳфилҳои рушди барвақтии кӯдакон ва баъд аз он ба муассисаи таҳсилоти миёнаи умумӣ ҷалб карда шаванд. Нақши волидон дар ин кор хеле муҳим аст, вале мутаассифона на ҳамаи онҳо аз вазифа ва ҳуқуқи кӯдакони дорои имконияти маҳдуд огоҳии комил доранд.

Аз ин рӯ, дар дар чунин ҳамоишҳо мо бори дигар онҳоро аз ҳуқуқу уҳдадориҳояшон  огоҳ мекунем ва ба онҳо тарзи дурусти тарбияи ин кӯдаконро мефаҳмонем», — илова намуд З.Набиева.

Сардори Раёсати маорифи вилоят Одинашоҳ Мардов ба таълиму таҳсил фаро гирифтани кӯдакони имконияташ маҳдудро як амри зарурӣ унвон намуда, изҳор дошт, ки то ҳол дар муассисаҳои таълимии вилоят ҳодисаи худдорӣ варзидани омӯзгорон  аз қабули чунин кӯдакон ба кӯдакистонҳо ё таълимгоҳҳо ба мушоҳида нарасидааст.

«Аммо баъзан суҳбатҳо дар мавриди он ки кӯдакони аз ҷиҳати ҷисмонӣ ноқис ба рафти дарс халал мерасонанд, ба гӯш мерасанд, ки ин овозае беш нест. Омӯзгори асил қабл аз ҳама равоншинос аст ва ӯ ба дили ҳар кӯдак хоҳ аълохон бошад, хоҳ душвортарбия ва  ё маъюб роҳ меебад. Агар зарур шавад, ба хонаашон рафта, ба онҳо таълим медиҳанд»,- зикр кард О.Мардов.

Номбурда аз волидони фарзандони имконияташ маҳдуд  хоҳиш кард, ки агар ҳангоми қабули фарзандонашон ба муассисаҳои томактабӣ ва ё мактабӣ бо ягон мушкил рӯ ба рӯ оянд, дар зудтарин фурсат ба  Раёсати маорифи вилоят  муроҷиат кунанд.

Алҳол дар шаҳри Хоруғ ташкилоти ҷамъиятии «Маркази нур» ба таълим, тарбия ва табобати зиёда аз  60 нафар кӯдакону наврасони имконияташ маҳдуд машғул аст. Бинои ташкилоти мазкур аз ду ошёна иборат буда, дар он синфхона, ошхона ва кабинетҳои тиббию варзишӣ мавҷуд аст.

Май 29, 2019 08:56

Хабарҳои дигари ин бахш

САРФАКОРӢ — БАРАКАТИ ЗИНДАГӢ. Ба миқдори сари сӯзан сарфа кардани зан баракатро дар хонадон дучанд меафзояд
ҚОНУНИ ТАНЗИМ — НАМУНА БАРОИ КИШВАРҲОИ МИНТАҚА. Дар давраи амали ин қонуни миллӣ беш аз 12 миллиард сомонӣ сарфа шудааст
Пешвои миллат: «Ба ҷойи ҳаҷҷу умраи такрорӣ анҷом додани амалҳои дорои садақаи ҷория савоби бамаротиб бештар дорад»
Президенти Тоҷикистон: «Шахсоне, ки имконияти молиявӣ надоранд, набояд ба хотири савоб аз дигарон қарз гирифта, қурбонӣ кунанд»
Аз ифлосшавии ҳавои атмосферӣ эҳтиёт намоед! Аз 6 то 9 июн дар Тоҷикистон чангу ғубор ба амал меояд
Эмомалӣ Раҳмон: «Оростани дастурхони пурдабдаба ва меҳмондории зоҳирпарастонаву намоишкоронаро дини мубини ислом, шариат ва таълимоти мазҳаби ҳанафӣ маҳкум мекунад»
ТОҶИКИСТОН – ВАТАНИ ОРЗУҲОИ ҶАВОНӢ. Дар Душанбе моҳвораи ҷавонон ҷамъбаст гардид
Вобаста ба омилҳои рушди сармояи инсонӣ дар Душанбе конфронс доир гардид
110 нафар соҳиби шаҳодатномаи маҳфили «Пайравони Пешвои миллат» гардиданд
Агентии обуҳавошиносӣ бо таҷҳизоти зарурии техникӣ таъмин мегардад
Падару модар дар таълиму тарбияи кӯдак чӣ ҳуқуқ ва уҳдадорӣ доранд?
Кӯдаконро аз иттилооти ба саломатӣ ва инкишофи онҳо зараровар ҳифз бояд намуд