Раҷаббой Аҳмадзода ба осебдидагони офати табиӣ: бо се вақт хӯроки гарм, хайма, либосу ашёи зарурӣ таъмин мешавед

ДУШАНБЕ, 04.06.2019. /АМИТ «Ховар»/. Раиси вилояти Суғд Раҷаббой Аҳмадзода барои ошноӣ  бо раванди бартарафсозии оқибатҳои офати табиӣ ва расонидани кумак ба оилаҳои зарардида ба шаҳри Конибодом  сафар кард, хабар медиҳад АМИТ «Ховар» бо истинод ба маркази матбуоти  Мақомоти иҷроияи ҳокимияти давлатии вилоят.

Хотиррасон мешавем, ки  шаби 2 июн бар асари боришоти зиёди борон дар бархе аз манотиқи шаҳри Конибодом, аз ҷумла ҷамоатҳои  ба номи Ғафурҷон Ортиқов ва Пӯлотон сел омад ва офати табиӣ ба хоҷагии халқи шаҳр    зарар расонид. Тибқи иттилои манбаъ, дар натиҷаи боришоти зиёди пай дар пай ва омадани сел 55 хонаи сокинон зарар диданд ва аз ин миқдор ашёи рӯзгор ва лавозимоти зарурии 31 оила пурра нобуд гардид.

Айни замон бо ҷалби сохторҳои марбута корҳои бартарафсозии оқибатҳои офати табиӣ ҷараён дошта, беш аз 250 нафар сарбозони қисмҳои низомӣ низ ба сокинон кӯмак расонида истодаанд. Баррасии хисороти воридшуда бошад аз ҷониби комиссияи  махсус идома дорад.

Раиси вилоят дар суҳбат бо сокинони зарардида  изҳор дошт, ки оқибатҳои офати табиӣ пурра бартараф карда шуда, зарардидагон бо се вақт хӯроки гарм, хайма, либосу ашёи зарурӣ таъмин ва аз хизматрасонии хадамоти беҳдоштиву санитарӣ  бархӯрдор хоҳанд шуд.

Раҷаббой Аҳмадзода дар аснои суҳбат бо мардуми зарардида ҳамзамон аз мушкилоти онҳо бохабар шуда, ба масъулини ниҳодҳои дахлдор ҷиҳати ҳалли  онҳо супоришҳои мушшахас дод.

Манбаъ қайд намудааст, ки барои пурра ба анҷом расонидани корҳои бартарафсозӣ ситоди доимоамалкунанда ташкил гардидаааст.