СММ: аҳолии Тоҷикистон то соли 2050 беш аз 5 миллион нафар афзоиш меёбад

Июнь 19, 2019 12:15

ДУШАНБЕ, 19.06.2019. /АМИТ «Ховар»/. Шумораи аҳолии сайёра то 30 соли ояндаи наздик 2 миллиард нафар зиёд шуда, он аз 7,7 миллиард нафар дар соли 2019 ба 9,7 миллиард нафар дар соли 2050 мерасад. Дар баробари ин аҳолии Ҷумҳурии Тоҷикистон низ то соли 2050 ба беш аз 5 миллион нафар афзуда, зиёда аз 14,5 миллион  нафарро ташкил хоҳад дод. Дар ин бора АМИТ «Ховар» бо истинод ба ҳисоботи Раёсати масоили иқтисодӣ ва иҷтимоии СММ «Дурнамои аҳолии ҷаҳон – 2019: Тамоюлҳои асосӣ» («World Population Prospects 2019: Highlights») хабар медиҳад.

Ҳамчунин тибқи ҳисоботи мазкур, аҳолии Тоҷикистон то соли 2095 ба беш аз 18,7 миллион нафар хоҳад расид, ки ин нишондод нисбат ба соли 2019 1 баробар зиёд мебошад.

Аҳолии мамлакат ба ҳолати 19 июни соли 2019 беш аз 9.29 млн. нафар буда, 0.12 дарсади аҳолии ҷаҳонро ташкил медиҳад. Аз рӯи шумораи аҳолӣ Тоҷикистон миёни кишварҳои ҷаҳон дар зинаи 96-ум қарор дошта, суръати афзоиши аҳолии он дар соли 2019 2.03 дарсад мебошад.

Дар асоси пешгӯиҳо, Тоҷикистон то соли 2050 аз рӯи шумораи аҳолӣ миёни кишварҳои ҷаҳон ба зинаи 82-юм ва то соли 2095 ба зинаи 78-ум мебарояд.

Мутобиқи пешгӯиҳои демографӣ, ҳамагӣ дар 9 кишвар — Ҳиндустон, Нигерия, Покистон, Ҷумҳурии Демократии Конго, Эфиопия, Танзания, Индонезия, Миср ва Иёлоти Муттаҳидаи Америка то соли 2050 афзоиши назарраси аҳолӣ ба чашм мерасад. Ҳамзамон гуфта мешавад, ки то соли 2027 Ҳиндустон яке аз кишварҳои сераҳолитарини дунё гардида, аз рӯи ин нишондод аз Чин пеш мегузарад. Инчунин то соли 2050 дар 55 кишвар камшавии шумораи аҳолӣ ба чашм расида, дар 26 тои онҳо коҳишёбӣ зиёда аз 10 дарсадро ташкил хоҳад дод.

Бино ба маълумоти манбаъ, аҳолии қитъаи Осиё, ки айни ҳол беш аз  4,58 млрд. нафар ё 59.43 дарсади аҳолии ҷаҳонро ташкил медиҳад, то соли 2050 ба беш аз 5,25 млрд. нафар расида, дар соли 2095 бошад то ба 4,85 млрд. нафар коҳиш меёбад.

Ҳамзамон аҳолии Осиёи Марказӣ (Қазоқистон, Қирғизистон, Тоҷикистон, Туркманистон ва Ӯзбекистон), ки ҳоло беш аз 72,85 млн. нафар ё 0.94 дарсади аҳолии ҷаҳонро ташкил медиҳад, то соли 2050 ба беш аз 94,4 млн. нафар ва то соли 2095 ба зиёда аз 100,5 млн. нафар мерасад.

Муаллифони тадқиқот бар он назаранд, ки аҳолии сайёра метавонанд то соли 2100 тақрибан ба ҳадди максималӣ, яъне 11 млрд. нафар расад.

Бояд гуфт, ки ҳисоботи «Дурнамои аҳолии ҷаҳон – 2019: Тамоюлҳои асосӣ» таҳлили муфассали моделҳо ва тамоюлҳои демографии дар ҳоли ҳозир анҷомшударо дар бар мегирад.

Июнь 19, 2019 12:15

Хабарҳои дигари ин бахш

Намояндаи Тоҷикистон дар ҷаласаи нахустини Комиссия оид ба ҳуқуқи инсони Иттиҳоди Давлатҳои Мустақил дар Минск иштирок намуд
Дар Душанбе бо мақсади баланд бардоштани ҳамкорӣ дар соҳаи тандурустӣ ҷаласа доир гардид
Бонки Осиёи Рушд бо мақсади фарогирии хизматрасонии босифати тиббӣ ба ноҳияҳои таҷрибавӣ — Дарвоз, Данғара ва Айнӣ маблағи иловагӣ ҷудо менамояд
Намояндаи Тоҷикистон дар машварати байналмилалӣ дар шаҳри Ню-Йорк иштирок дорад
Дар Хатлон ҳамкорӣ бо шарикони рушд дар соҳаҳои мухталифи иҷтимоӣ баррасӣ гардид
СОЛҲОИ РУШДИ САНОАТ. Коргоҳи дӯзандагии Литсеи касбӣ- техникии ноҳияи Шуғнон хонандагонро бо либоси мактабӣ таъмин менамояд
«ТОҶИКИСТОН-ПЕШОҲАНГИ МАСОИЛИ ҲИФЗИ ПИРЯХҲО ДАР ҶАҲОН». Дар ин мавзуъ машғулияти омӯзишӣ гузаронида шуд
Дар Душанбе Конфронси миллӣ оид ба ҳалли масоили зӯроварии гендерӣ баргузор шуд
Дар Душанбе вобаста ба роҳу усулҳои пешгирии коррупсия дар соҳаи тандурустӣ машғулияти омўзишӣ доир шуд
Меҳринисо Тухтабоева: «Ифтихормандам, ки 6 писарам дар сафи Қувваҳои Мусаллаҳи Ҷумҳурии Тоҷикистон хизмат менамоянд»
35-СОЛАГИИ ИСТИҚЛОЛИ ДАВЛАТӢ. Дар деҳаи Чорбоғи шаҳри Панҷакент бинои беморхонаи минтақавӣ сохта мешаванд
Вазири тандурустӣ ва ҳифзи иҷтимоии аҳолӣ бо фаъолияти Беморхонаи марказӣ ва Маркази саломатии ноҳияи Хуросон шинос гардид