«САЛОМАТИИ МИЛЛАТ – БОИГАРИИ АСОСИИ ДАВЛАТ». Таҳти роҳбарии муовини Сарвазири мамлакат Азим Иброҳим дар Душанбе ҷаласаи навбатии Шӯрои ҳамоҳангсозӣ оид ба бехатарии маҳсулоти хӯрокворӣ доир гардид

 ДУШАНБЕ, 02.07.2019. /АМИТ «Ховар»/. Имрӯз дар бинои Вазорати рушди иқтисод ва савдои Ҷумҳурии Тоҷикистон зери роҳбарии Раиси Шӯрои ҳамоҳангсозӣ оид ба бехатарии маҳсулоти хӯрокворӣ, муовини Сарвазири мамлакат Азим Иброҳим ҷаласаи дувоздаҳуми Шӯро баргузор гардид.

Зикр гардид, ки Ҳукумати Ҷумҳурии Тоҷикистон таъмини бехатарии озуқавориро, ки ҳадафи асосии он нигоҳдошт ва ҳимояи генофонди миллат мебошад, яке аз вазифаҳои стратегии худ қарор додааст. Бо қарори Ҳукумати ҶТ аз 31 декабри соли 2014 таҳти №808 Стратегия оид ба ғизо ва фаъолияти ҷисмонӣ дар Ҷумҳурии Тоҷикистон барои солҳои 2015-2024 қабул шудааст.

Тавре дар ин стратегия омадааст, риоя нашудани қоидаҳои истеҳсол ва истеъмоли ғизо, ки ба сар задании бемориҳои гуногун сабаб мешавад, дар Тоҷикистон низ, чун дар аксари кишварҳо, аз мушкилоти асосии соҳаи нигаҳдории тандурустӣ маҳсуб меёбад.

Муовини Сарвазир фаъолияти мақомоти аъзои Шӯроро натиҷагирӣ намуда, зикр кард, ки дар самти ҳимояи бозори истеъмолӣ аз воридоти маҳсулоти ғизоии ба саломатӣ хатарнок ва пешгирии истеҳсоли маҳсулоти пастсифат дар ҷумҳурӣ аз ҷониби гурӯҳҳои корӣ корҳои мушаххас ба анҷом расонида шудаанд, вале ин амалҳо қонеъкунанда набуда, дар ин самт ҳоло ҳам мушкилоти зиёде ҷой дорад.

Азим Иброҳим ҳамчунин оид ба таъмини ғизои солим, бехатарии маҳсулоти ғизоӣ, пешгирии воридоти маҳсулоти хӯроквории пастсифат ва ба саломатӣ хатарнок, ҳолатҳои сироятёбии аҳолӣ, тақвият додани корҳои фаҳмондадиҳӣ тариқи воситаҳио ахбори омма, ҷорӣ намудани талаботи низоми идоракунии сифат тибқи талаботи стандартҳои байналмилалии силсилаи ИСО ва низоми бехатарии ҲАССП (НАССР) (таҳлили хатарҳо ва назорат дар нуқтаҳои назорати таҳдидомез), таҳия ва таҷдиди санадҳои меъёрӣ-ҳуқуқӣ, такмил додани озмоишгоҳҳои ташхиси маҳсулоти хӯрокворӣ ибрози андеша намуд.

«Ҳар яки мобояд воқеъбинона ба фаъолияти худ баҳо диҳем, яъне то кадом андоза мо уҳдадориҳои худро бо масъулият иҷро мекунему дар ҳифзи саломатии мардуми кишвар ва ҳимояву солимии генофонди миллиамон саҳмгузор мебошем. Ҳамагон шоҳиди он ҳастем, ки дар байни аҳолӣ навъҳои гуногуни бемориҳо, ки бевосита ба истеъмоли маҳсулоти хӯрокворӣ алоқамандӣ доранд, ба қайд гирифта шудаанд, аз ҷумла ҳолатҳои аз меъёр зиёд истифода намудани нуриҳои маъданию заҳрхимикатҳо дар меваю сабзавот ва маҳсулоти полезӣ ҷой дорад ва ин амал моро водор месозад, ки бо масъулияти ҷиддӣ фаъолият намуда, корҳоро боз ҳам дар ин самт тақвият бахшем», — таъкид дошт муовини Сарвазир.

Зикр гардид, ки дар шаш моҳи соли 2019 дар миқёси ҷумҳурӣ 5 ҳодисаи заҳролудшавии шаҳрвандон, вобаста ба маводҳои ғизоӣ ба қайд гирифта шуд ва дар натиҷа 15 нафар шаҳрвандон сироят ёфта, аз ин теъдод 1 нафарашон фавтид.

Дар натиҷаи тақвият бахшидани корҳои фаҳмондадиҳӣ шумораи сироятёбии шаҳрвандон нисбат ба ҳамин давраи соли сипарӣ коҳиш ёфта, хушбахтона ҳодисаҳои заҳролудшавӣ дар муассисаҳои хӯроки умумӣ, савдо ва корхонаҳои коркарди маҳсулоти хӯрокворӣ ба қайд гирифта нашуд.

Ҳамзамон Раиси Шӯро ҷиҳати боз ҳам тақвият додани корҳои фаҳмондадиҳӣ, ба танзим даровардани савдои маҳсулоти ғизоӣ дар кӯчаю ҷойҳои муқаррарнашуда, пурзӯр намудани ҳамоҳангии фаъолияти мақомоти назоратӣ, омӯзиши вазъи истеҳсол ва коркарди намаки ошӣ, назорати ҷиддии истифодаи нуриҳои маъданӣ дар сабзавоту полезиҳо, бо дарки масъулият содиқона фаъолият намудан ва барои ислоҳи камбудиҳои ҷойдошта масъулинро вазифадор намуд.

Дар рафти ҷаласа дар баробари баррасии масъалаҳои пешбинигардида, инчунин Нақшаи кории Шӯро барои нимсолаи дуюми соли 2019 муҳокима ва тасдиқ карда шуд.

«Дар яке аз суханрониҳояшон Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон зикр намуданд, ки саломатии миллат боигарии асосии давлат аст. Итминон дорам, ки масъалаҳои дар ҷаласаи имрӯза баррасишуда ба ҳалли масоили муҳими фаъолияти мақомоте, ки бевосита ба бехатарии маҳсулоти хӯрокворӣ ва ҳифзи бозори истеъмолӣ аз воридоти маҳсулоти пастсифат ва ба саломатӣ хатарнок нигаронида шудаанд, мусоидат менамоянд ва мо сиёсати пешгирифтаи  Сарвари давлат муҳтарам Эмомалӣ Раҳмон ва Ҳукумати Ҷумҳурии Тоҷикистонро ба хубӣ дарк намуда, содиқона ба халқу ватани азизамон хизмат менамоем», — тазаккур дод дар фарҷом муовини Сарвазири мамлакат Азим Иброҳим.