Дар шаҳри Душанбе Мусобиқаи X байналмилалӣ оид ба теннис барои дарёфти Ҷоми Президенти Тоҷикистон расман ифтитоҳ гардид

Август 23, 2019 22:00

ДУШАНБЕ, 23.08.2019 /АМИТ «Ховар»/. Шоми 23 августи соли равон дар Қасри тенниси шаҳри Душанбе маросими кушодашавии X-умин Мусобиқаи байналмилалӣ оид ба теннис миёни наврасони то 17-сола барои дарёфти Ҷоми Президенти Ҷумҳурии Тоҷикистон баргузор гардид. Дар ин маврид шореҳи варзиши АМИТ «Ховар» Меҳрони ҚУРБОН хабар медиҳад. 

Сардори Раёсати илму маърифати Дастгоҳи иҷроияи Президенти Ҷумҳурии Тоҷикистон Абдухолиқзода Лутфия ва раиси Кумитаи кор бо ҷавонон ва варзиши назди Ҳукумати ҷумҳурӣ, ноиби Президенти Кумитаи миллии олимпии Тоҷикистон Абдуллозода Аҳтам варзишгарон ва иштирокчиёнро таҳният гуфта, барояшон дар рақобатҳо барор хостанд.

Лутфия Абдухолиқзода аз ҷумла қайд кард, ки имрӯз дар доираи татбиқи сиёсати созандаи Президенти Ҷумҳурии Тоҷикистон, Пешвои миллат, муҳтарам Эмомалӣ Раҳмон ва Ҳукумати Ҷумҳурии Тоҷикистон баргузории мусобиқаи байналмилалии теннис миёни наврасон барои дарёфти Ҷоми Президенти Ҷумҳурии Тоҷикистон басо рамзӣ мебошад, зеро варзиш яке аз самтҳои афзалияноки сиёсати иҷтимоии давлату ҳукумат маҳсуб мегардад.

Албатта, нақш ва ҷойгоҳи Пешвои муаззами миллат дар рушди тарбияи ҷисмонӣ ва варзиш ифодакунандаи сиёсати мантиқии давлату ҳукумат ба таҳкими ҳаёти иҷтимоии ҷомеа, ки маҳаки асосии онро солимии миллат, ташвиқу таблиғи тарзи ҳаёти солим, таҳкими дӯстӣ ва тарғиби идеяи миллати солим ташкил медиҳад, асос меёбад.

Баргузории мусобиқаи байналмилалӣ дар Ҷумҳурии Тоҷикистон барои дарёфти Ҷоми Президенти Ҷумҳурии Тоҷикистон ифодаи олии мавқеи устувори Ҷумҳурии Тоҷикистон дар рушди соҳаи варзиши кишвар ва ҷаҳон, инчунин таҳкими ҳаракати олимпии дунё мебошад. Тавре борҳо Пешвои муаззами миллат таъкид намудаанд: «Миллати ҷисман солим рӯҳан низ муқтадир ва шикастнопазир мебошад» ё «Варзиш беҳтарин воситаи муаррифӣ кардани давлату миллат мебошад».

Дар ин замина, бо мақсади рушди теннис дар ҷумҳурӣ бо Фармони Президенти Ҷумҳурии Тоҷикистон аз 19 марти соли 2005, №1535 нахустин мусобиқаи байналмилалӣ оид ба теннис миёни наврасон барои дарёфти Ҷоми Президенти Ҷумҳурии Тоҷикистон гузаронида шуд. Баъдан дар асоси қарори Ҳукумати Ҷумҳурии Тоҷикистон аз 21 июли соли 2006, №340 ҳамасола рӯзҳои 23-27 август дар шаҳри Душанбе мусобиқаи мазкур баргузор мешавад, ки имсол мо даҳсолагии онро якҷо бо Шумо таҷлил намуда истодаем.

Дар заминаи мусобиқаи мазкур, аз соли 2017 дар Ҷумҳурии Тоҷикистон тибқи тақвими Федератсияи байналмилалии теннис мусобиқаи байналмилалӣ оид ба теннис «Tajikistan Open» ва «Tajikistan tennis Federation Cup» доир мегарданд, ки ба рушди бемайлони ин намуди зебои варзиш мусоидат мекунад.

Аҳтам Абдуллозода зимни баромадаш меҳмононро аз 9 давлати дунё ба Тоҷикистони азиз хайрамақдам гуфта, афзуд, ки маҳз зери роҳнамоии Пешвои муаззами миллат, муҳтарам Эмомалӣ Раҳмон дар кишвар ҳар сол баргузории 2 мусобиқаи байналмилалӣ барои дарёфти Ҷоми Президенти Ҷумҳурии Тоҷикистон оид ба теннис ва дзюдо, Ниммарафони байналмилалии Душанбе, мусобиқаҳои квалификатсионӣ оид ба теннис, оғози баргузории Ҷоми Пешвои миллат оид ба шоҳмот, баргузории машқҳои дастаҷамъонаи пагоҳирӯзӣ ҳар рӯзи шанбе бозгӯии олии таҳкими солимии ҷомеа, тарғибу ташвиқи тарзи ҳаёти солим ва рушди ҳаракати олимпии Тоҷикистон ба ҷомеаи ҷаҳон мебошад. Боварии комил дорам, ки мусобиқаи имсола низ дар замири варзишгарони навраси 10 давлати дунё дӯстиву рафоқат, якдиливу ҳамбастагӣ ва чеҳраҳои нави варзиши теннисро ба арсаи байналмилалӣ муайян ва пешкаш менамояд.

Ёдовар мешавем, ки дар мусобиқаи имсола варзишгарон аз ҷумҳуриҳои Афғонистон, Беларус, Канада, Қирғизистон, Покистон, Туркманистон, Тоҷикистон, Узбекистон, Федератсияи Россия ва Иёлоти  Муттаҳидаи Амрико ширкат менамоянд. Ҷумҳурии моро 12 варзишгар (6 писар, 6 духтар) намояндагӣ мекунанд. Қувваозмоиҳо дар корти тенниси «Роҳи оҳан» доир мегарданд. Ғолибон бо 1000 доллари ИМА, барандагони ҷои дуюм бо 800 доллар ва ҷои сеюм бо 500 доллари ИМА қадрдонӣ мегарданд.

Август 23, 2019 22:00

Хабарҳои дигари ин бахш

ҶОМИ ОСИЁ-2026. Дастаи мунтахаби олимпии Тоҷикистон (U-23) марҳилаи интихобиро бо пирӯзӣ бар Непал оғоз кард
«CAFA Nations Cup 2025». Имрӯз дастаи мунтахаби Тоҷикистон бо тими Эрон бозӣ мекунад
РӮЗИ БАЙНАЛМИЛАЛИИ ТАЭКВОНДО. Ин навъи варзиши олимпӣ дар Тоҷикистон рушди бештар меёбад
ҶОМИ ОСИЁ-2026. Дастаи олимпии Тоҷикистон (U-23) дар марҳилаи интихобӣ нахустин бозӣ доир менамояд
Дар Душанбе Мусобиқаи байналмилалӣ оид ба шиноварӣ оғоз ёфт
«CAFA NATIONS CUP 2025». Дастаи мунтахаби Тоҷикистон бо дастаи Афғонистон бозӣ менамояд
Таҳкими ҳамкорӣ байни Тоҷикистон ва вилояти Форси Эрон дар бахши ҷавонон ва варзиш баррасӣ гардид
Дар Ҳисор мусобиқаи «CAFA Nations Сup 2025» дар гурӯҳи «В» оғоз мешавад
Ҳайати Кумитаи кор бо ҷавонон ва варзиши Тоҷикистон бо Академияи Кумитаи миллии олимпии Эрон шинос шуд
Барномаи иҷроии ҳамкорӣ байни Тоҷикистон ва Эрон дар соҳаи варзиш ва ҷавонон ба имзо расид
Бо иштироки ҷавонони Тоҷикистон ва Эрон ҳамоиш доир гардид
Дар Теҳрон густариши ҳамкории Тоҷикистон ва Эрон дар самти ҷавонон ва варзиш баррасӣ гардид