Созмони Умумиҷаҳонии Савдо огоҳиномаи ирсолнамудаи Ҷумҳурии Тоҷикистонро қабул намуд

ДУШАНБЕ, 30.08.2019./АМИТ «Ховар»/. Тайи як соли охир Вазорати рушди иқтисод ва савдо ҷиҳати иҷрои супориши Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон якҷо бо коршиносони Созмони Умумиҷаҳонии Савдо (СУС) пайваста корбарӣ намуда, бо назардошти зиёд намудани манфиатҳои иқтисодии давлат ва риояи талаботи СУС огоҳиномаи уҳдадориҳои категорияҳои “В” ва “С”-и Ҷумҳурии Тоҷикистонро таҳия ва пешниҳод намуд, ки он аз ҷониби СУС қабул гардид.

Тавре аз Вазорати рушди иқтисод ва савдои ҷумҳурӣ ба АМИТ «Ховар» иттилоъ доданд, 14-16 августи соли 2018 Вазорат бо кумаки техникии Маркази байналмилалии савдо (МБС) оид ба «Афзалиятдиҳии доимӣ ва стратегияи татбиқи Созишномаи СУС оид ба содагардонии расмиёти савдо» семинари миллӣ баргузор намуд, ки зимни он категорияҳои “А”, “В” ва “С” ба иштирокчиён пешкаш гардид. Дар натиҷа уҳдадориҳои содагардонии расмиёти савдо аз нав бозбинӣ шуданд.

Натиҷаи семинари мазкур дар ҷараёни ҷаласаи 6-уми Кумитаи ҳамоҳангсоз оид ба содагардонии расмиёти савдо 21 декабри соли 2018 бо назардошти эроду пешниҳодҳои вазорату идораҳо (аъзои Кумита) бо супориши дахлдор тасдиқ гардид.

Инчунин ҳайати расмии Ҷумҳурии Тоҷикистон таҳти роҳбарии муовини якуми Вазири рушди иқтисод ва савдо З. Завқизода ба шаҳри Женеваи Швейтсария сафар кард, ки дар доираи он татбиқи уҳдадориҳо дар самти содагардонии расмиёти савдо ва пешниҳоди огоҳиномаи категорияҳои “В” ва “С” баррасӣ гардиданд.

Дар натиҷа огоҳиномаи ирсолнамудаи уҳдадориҳои категорияҳои “В” ва “С”12 августи соли равон дар сомонаҳои расмии СУС (www.wto.org ва www.tfadatabase.org) ҷойгир карда шуд.

Зикр бояд кард, ки категорияи “В” вақти иловагӣ ва категорияи “С” вақти иловагӣ ва ҳам кумаки молиявию техникии шарикони рушдро дар бар мегирад.

Акнун Ҷумҳурии Тоҷикистон метавонад ҷиҳати татбиқи уҳдадориҳои категорияҳои “В” ва “С” аз шарикони рушд кумакҳои молиявию техникӣ ҷалб намояд.