ТЕННИС. Варзишгарони 10 давлат барои дарёфти Ҷоми Президенти Тоҷикистон талош меварзанд

ДУШАНБЕ, 21.08.2019 /АМИТ «Ховар»/. Дар Мусобиқаи X байналмилалӣ оид ба теннис миёни наврасони то 17-сола барои дарёфти Ҷоми Президенти Ҷумҳурии Тоҷикистон, ки 23-27 август дар шаҳри Душанбе баргузор мегардад, иштироки теннисбозони 10 давлат, аз ҷумла Тоҷикистон дар назар аст. Дар ин бора АМИТ «Ховар» бо истинод ба Кумитаи миллии олимпии Тоҷикистон хабар медиҳад.

Дар мусобиқаи мазкур, ки дар асоси тақвими чорабиниҳои варзишии Кумитаи кор бо ҷавонон ва варзиши назди Ҳукумати ҷумҳурӣ дар ҳамкорӣ бо Федератсияи тенниси Тоҷикистон доир мешавад, иштироки варзишгарон аз Афғонистон, Беларус, Канада, Қирғизистон, Покистон, Туркманистон, Тоҷикистон, Ӯзбекистон, Россия ва ИМА дар назар аст. Ҷумҳурии Тоҷикистонро дар ин мусобиқа 12 варзишгар намояндагӣ мекунанд.

Қувваозмоиҳо дар корти тенниси “Роҳи оҳан” доир мегарданд.

Мусобиқаи  байналмилалӣ оид ба теннис миёни наврасон барои дарёфти Ҷоми Президенти Ҷумҳурии Тоҷикистон cоли даҳум аст, ки бо мақсади муттаҳидӣ, ягонагӣ ва дӯстӣ миёни варзишгарон баргузор мешавад.

Мусобиқа 4 рӯз дар ҳайати инфиродӣ ва даставӣ миёни писарону духтарон идома ёфта, дар ҷамъбаст ба ғолибони ҷойи якум 1000 доллари ИМА, ҷойи дуюм — 800 доллари ИМА ва ҷойи сеюм — 500 доллари ИМА ҷоизапулӣ тақдим мегардад.