ЗИНДА БОШЕД ВА АЗ ЁД НАБАРЕД! Шӯрои сарони давлатҳои иштирокчии ИДМ дар робита ба 80-солагии оғози Ҷанги дуюми ҷаҳон изҳорот қабул намуд

ДУШАНБЕ, 01.09.2019. / АМИТ «Ховар»/. Имрӯз, 1 сентябр аз оғози Ҷанги дуюми ҷаҳон 80 сол пур шуд. Маҳз дар ҳамин рӯзи соли 1939 бо ҳамлаи Германия  ба Полша  бузургтарин ҷанг дар таърихи инсоният оғоз пазируфт. Дар он 57 кишвар  ширкат намуданд. Шумораи умумии нафароне, ки давлатҳо ба ин ҷанг равона карданд, ба беш аз 1,7 миллиард расида буд. Аз рӯи ҳисобҳои гуногун, талафоти умумӣ, бо назардошти ҳам низомиён ва ҳам аҳолии осоишта, аз 50 то 80 миллион нафарро ташкил медиҳад.

Дар арафаи 80-солагии оғози Ҷанги дуюми ҷаҳон бо қарори Шӯрои сарони давлатҳои иштирокчии ИДМ аз 5 августи соли ҷорӣ   изҳорот қабул гардид.

Дар ин изҳорот, аз ҷумла омадааст, ки Ҷанги дуюми ҷаҳон бузургтарин фоҷиаи асри 20 буд, ки даҳҳо миллион одамон ҳалок шуданд. Бузургтарин фалокати башарӣ дар таърихи инсоният натиҷаи талошҳои таҷовузкоронаи нафароне буд, ки ба бартарии нажодӣ ва ҳуқуқии худ бовар дошт, то мустақилона дар баробари тақдири дигар кишварҳо ва қавмҳо тасмим гиранд.

(Матни пурраи Изҳороти сарони давлатҳои ИДМ дар иртибот ба 80-солагии оғози Ҷанги дуюми ҷаҳон  дар бахши  русии сомонаи АМИТ «Ховар» ҷой дода шудааст).