Дар Душанбе Намоиши байналмилалии молу маҳсулот доир мегардад

ДУШАНБЕ, 19.10.2019 /АМИТ «Ховар»/.  Аз 24 то 26 октябр дар бинои Муассисаи давлатии «Мактаби ҷумҳуриявии маҳорати олии варзишӣ оид ба намудҳои гӯштин»-и шаҳри Душанбе, (воқеъ дар кӯчаи Варзишӣ,2) Намоишгоҳи байналмилалии универсалии “Тоҷикистон- тирамоҳ 2019” баргузор мегардад. Дар ин бора ба АМИТ «Ховар» аз Палатаи савдо ва саноати Ҷумҳурии Тоҷикистон  хабар доданд.  

Ба иттилои манбаъ,  дар намоишгоҳи мазкур молу маҳсулоти бахшҳои сохтмон, энергетика, таҷҳизот ва технологияҳои истеҳсолӣ, саноати кимиё, соҳаҳои кишоварзӣ, хӯрокворӣ, тандурустӣ, саноати сабук, сайёҳӣ, ҳунарҳои мардумӣ, сармоягузорӣ ва ғайра муаррифӣ карда мешаванд.

Дар назар  аст,  ки дар Намоишгоҳи «Тоҷикистон- тирамоҳ 2019»  намояндагони  ширкатҳои бонуфузи давлатҳои хориҷии дуру наздик ва ватанӣ иштирок намоянд.

Ёдовар бояд шуд, ки маросими расмии ифтитоҳи Намоишгоҳи байналмилалии универсалии «Тоҷикистон- тирамоҳ 2019» 24 октябр, соати  10:00, дар  «Кохи Борбад»  гузаронида мешавад. Ҳамчунин дар доираи намоишгоҳи мазкур  25 октябр баргузории  ҳамоиши доираи соҳибкорон  ба нақша гирифта шудааст.