Масъалаи омодасозии мутахассисони маҳаллӣ барои соҳаи нассоҷӣ ва дӯзандагии Тоҷикистон баррасӣ мегардад

Октябрь 30, 2019 10:10

ДУШАНБЕ, 30.10.2019 /АМИТ «Ховар»/. Омодасозии мутахассисони соҳибкасби маҳаллӣ барои соҳаи нассоҷӣ ва дӯзандагии Тоҷикистон имрӯз зимни ҳамоиш дар Душанбе баррасӣ мегардад. Созмондиҳандагони он Иттифоқи рушди бахши хусусии Тоҷикистон ва Маркази тиҷорати байналмилалӣ мебошанд. Интизор меравад, ки ҳамкорӣ миёни давлат, муассисаҳои таълимӣ ва бахши хусусӣ ҷиҳати дастаҷамъона эҷод намудани заминаҳои дониш ва тавоноӣ барои соҳаи нассоҷӣ ва дӯзандагӣ аз ҷониби иштирокдорону коршиносони соҳа баррасӣ шавад. 

Дар хабаре, ки аз МТБ ба АМИТ «Ховар» расидааст, гуфта мешавад, ки  намояндагони корхонаҳои нассоҷиву дӯзандагӣ, муассисаҳои таълимӣ, вазоратҳои марбута ва созмонҳои байналмилалӣ бо ҳам ҷамъ омада, масоили рушди соҳаро бо таваҷҷуҳи махсус ба омодасозии мутахассисон ва роҳҳои тақвияти ҳамкорӣ миёни соҳаи нассоҷию дӯзандагӣ ва муассисаҳои таълимӣ барои ҳалли мушкилоти соҳа  баррасӣ мекунанд.

Раиси Шӯрои Иттифоқи рушди бахши хусусии Тоҷикистон Файзалӣ Раҷабов мегӯяд, ки «дониш барои тиҷорат калиди муваффақият аст. Донишҳои замонавӣ ба тиҷорат имкон медиҳанд, ки бо маҳсулоти хушсифат марзҳоро убур карда, соҳибкории маҳаллӣ ба бозори байналмилалӣ роҳ ёбад. Мушкили дарёфти мутахассисон дар самтҳои асосӣ барои рақобатпазирии муассири саноати мо монеаҳои ҷиддӣ эҷод мекунад. Ҷавобгӯ набудани донишу мутахассисон ба талаботи феълии соҳа ва бозори меҳнат, дастрас набудани муассисаҳои таълимию омӯзишӣ ба фанновариҳои замонавӣ, мушкили ҷалби ҷавонони лаёқатманд ба соҳа ва барномаҳои кӯҳнаи таълимӣ мушкилоти асосие мебошанд, ки дар ҳамоиш матраҳ мегарданд».

Иштирокдорони ҳамоиш вазъи кунунии ҳамкорӣ миёни соҳаи нассоҷӣ ва дӯзандагии Тоҷикистон ва муассисаҳои таълимиро баррасӣ карда, имкониятҳои нави тақвияти ҳамкориро ҷӯё мешаванд. Ҳамчунин стандартикунонии низоми маориф ва барномаҳо, фароҳамории имкониятҳои таҷрибаомӯзӣ барои донишҷӯён ва пешниҳоди корҳои рақобатпазир ва ҷолиб ҳам баррасӣ хоҳанд гардид.

Октябрь 30, 2019 10:10

Хабарҳои дигари ин бахш

Рушди хатсайрҳои байналмилалии мултимодалӣ байни Тоҷикистон ва Туркманистон баррасӣ карда шуд
Ҳайати Тоҷикистон дар марҳилаи аввали омӯзиши таҷрибаи Қирғизистон дар соҳаи идоракунии молияи давлатӣ иштирок намуд
Татбиқи Лоиҳаи беҳтаргардонии таҷҳизоти сканеркунии борҳо дар нуқтаи назорати гумрукӣ дар Спитамен баррасӣ гардид
Дар Бохтар оид ба кам кардани талафоти неруи барқ вохӯрӣ доир гардид
Дар Бадахшон ҳаҷми истеҳсоли маҳсулоти кишоварзӣ беш аз 225 миллион сомониро ташкил дод
Дар Тоҷикистон шумораи занони соҳибкор ва роҳбарони хоҷагиҳои деҳқонӣ афзоиш меёбад
Бонки ҷаҳонӣ татбиқи Барномаи «Дастгирии сиёсати рушди устувор — Тоҷикистони рақобатпазир ва фарогир»-ро тасдиқ намуд
Агентии назорати давлатии молиявӣ ва мубориза бо коррупсия ба маблағи беш аз 624 миллион сомонӣ зарари молиявӣ ошкор намуд
Даромади буҷети Вилояти Мухтори Кӯҳистони Бадахшон 105,1 фоиз иҷро гардидааст
ҲИСОББАРОБАРКУНИИ ҒАЙРИНАҚДӢ. 3,5 миллион амалиёти пардохти андоз ва боҷҳо ба таври ғайринақдӣ анҷом дода шуд
Дар Душанбе тавсеаи ҳамкории Тоҷикистон бо JICA баррасӣ гардид
Зернизоми идораи эътимод бо истифода аз модули иловагии «Data mining» мавриди истифода қарор гирифт