Мутахассисони Қазон донишҷӯёни тоҷикро бо технологияҳои журналистикаи муосир шинос месозанд

ДУШАНБЕ, 02.10.2019 /АМИТ «Ховар»/. Имрӯз дар шаҳри Хуҷанд курси махсуси журналистикаи телевизионӣ барои рӯзноманигорони ҷавон оғоз ёфт, ки онро кормандони Донишгоҳи федералии Қазон мегузаронанд. Ташкилкунандаи давраи омӯзишӣ Институти тадқиқоти Осиёи Марказӣ мебошад. Дар ин бора маркази матбуоти ин донишкада хабар медиҳад.

Мавзӯъҳое, ки дар курси махсус баррасӣ мегарданд, инҳоянд: жанрҳо ва қолабҳои рӯзноманигории телевизионӣ, навъҳои гуногуни гузоришҳо, кор бо манбаъҳо ва шабакаҳои иҷтимоӣ, фейк-хабарҳо ва қоидаи се манбаъ, принсипҳои ташаккули матни хабар, хусусиятҳои ташаккули таҳияи барномаи иттилоотӣ ва ғайра.

«Асосҳои назариявии барои омӯзиш пешниҳодшуда мустақиман ҳангоми таҳлили онҳо ба тарзи амалия низ пешниҳод мешаванд, то аз худ кардани мавод то ҳадди имкон самаранок бошад. Илова бар ин, дар охири курси махсус иштирокчиён бо назардошти маводи омӯхташуда стендап мегузаронанд », — гуфт манбаъ.

Маърӯзачиёни курси махсус роҳбари озмоишгоҳи омӯзишии UNIVER ТВ дар Донишкадаи илмҳои иҷтимоиву фалсафӣ ва коммуникатсияи оммавии ДФҚ Лайсан Абдуллина ва муаллими кафедраи ВАО миллӣ ва глобалии Мактаби олии журналистика ва медиакоммуникатсияи Донишкадаи илмҳои иҷтимоиву фалсафӣ ва комуникатсияи оммавии ДФҚ, узви ҳукумати ҷавонони Тотористон Алина Сисоева мебошанд.