Дар Душанбе ҷаласаи Шӯрои ҳамкорӣ дар соҳаи тандурустии давлатҳои узви ИДМ баргузор гардид
ДУШАНБЕ, 08.11.2019. /АМИТ «Ховар»/. Имрӯз дар шаҳри Душанбе ҷаласаи 30-юми Шӯрои ҳамкорӣ дар соҳаи тандурустии давлатҳои узви Иттиҳоди Давлатҳои Мустақил оғоз гардид. Тавре мухбири АМИТ «Ховар» иттилоъ медиҳад, ҷаласаи мазкур таҳти раёсати Раиси Шӯро, Вазири тандурустӣ ва ҳифзи иҷтимоии аҳолии Ҷумҳурии Тоҷикистон Насим Олимзода доир гардида, дар он намояндагони Кумитаи иҷроияи ИДМ, Ӯзбекистон, Қазоқистон, Қирғизистон, Туркманистон, Озарбойҷон, Арманистон, Беларус, Молдова, Россия ва коршиносону шарикони байналмилалӣ иштирок намуданд.
«Тандурустии аҳолӣ яке аз самтҳои муҳими рушди иқтисодиёти мамлакати мо ба ҳисоб меравад. Дар ин ҷода рушди ҳамкории соҳаи тандурустӣ дар доираи ИДМ муҳим мебошад», — зикр намуд Насим Олимзода.
Раиси Шӯрои ҳамкорӣ дар соҳаи тандурустии давлатҳои узви Иттиҳоди Давлатҳои Мустақил Насим Олимзода оид ба Раёсати Тоҷикистон дар Шӯро дар соли 2019 ҳисобот дода, ҳамгироии сохторҳои тандурустии мамлатҳои узви Иттиҳодро дар соли 2019 хуб арзёбӣ намуд.
Зикр гардид, ки соли равон дар доираи Шӯро 47 чорабинии соҳавӣ баргузор гардида, дар рушди ҳамкорӣ заминаи хубтар фароҳам оварданд.
Аъзои Шӯро мавзӯъҳои вобаста ба ҳамкорӣ дар соҳаи психиатрия, онкология, эндокринология, солимии репродуктивӣ ва стоматологияро муҳокима намуданд.
Дар ҷаласа инчунин масъалаҳои ҳамкорӣ бо Шӯрои машваратӣ оид ба меҳнат, шуғл ва ҳифзи иҷтимоии аҳолии давлатҳои узви ИДМ дар таҳияи лоиҳаи тавсияҳо оид ба баҳодиҳии шароити кор дар ҷойҳои корӣ бо мамлакатҳои минтақаи аврупоии Ташкилоти умумиҷаҳонии тандурустӣ баррасӣ гардиданд.
Иштирокчиёни ҷаласа оид ба ҳамкории минбаъда дар самти мубориза бо бемориҳои сироятиву ғайрисироятӣ мубодилаи афкор карданд. Инчунин дар ҷаласа иҷрои қарорҳои қаблан қабулшуда, нақшаи чорабиниҳои асосии Шӯро барои соли 2019 баррасӣ ва нақшаҳо барои соли 2020 муайян карда шуданд.
Ёдовар мешавем, ки Шӯрои ҳамкорӣ дар соҳаи тандурустии давлатҳои узви Иттиҳоди Давлатҳои Мустақил аз соли 1992 инҷониб баргузор гардида, соли 2019 раёсати онро Ҷумҳурии Тоҷикистон ба уҳда дорад.
Ҷаласаи 30-юми Шӯрои мазкур пагоҳ, 9 ноябр дар шаҳри Душанбе идома меёбад.
МАРКАЗИ РУШДИ ҲУНАРМАНДӢ ВА МАЛАКАҲОИ КАСБИИ МУОСИР. Кадом касбу ҳунарро дар ин ҷо метавон омӯхт?
Бахшида ба Рӯзи кормандони соҳаи меҳнат ва ҳифзи иҷтимоии аҳолӣ ҳамоиш доир шуд
ТАРМАФАРОӢ. Имрӯз дар баъзе ноҳияҳои Тоҷикистон фаромадани тарма пешгӯӣ мешавад
Дар вилояти Хатлон оид ба таълим ва тарбияи ҳуқуқии шаҳрвандон ҷаласа доир шуд
ҲАДАФ-ҲИФЗИ ПАРАНДАГОН ВА ҲАЙВОНОТ. Дар Тоҷикистон корҳои биотехникӣ гузаронида мешаванд
Муассисаҳои таълимии таҳсилоти ибтидоӣ ва миёнаи касбӣ бо таҷҳизоти муосири омӯзишӣ таъмин карда мешаванд
«МО НАКУНЕМ, КӢ МЕКУНАД?». Дар Душанбе бо иштироки волонтёрон ҳашари барфтозакунӣ ташкил гардид
Аз шаби дирӯз то имрӯз дар масири Душанбе-Чанок 29 тарма фаромадааст
Лоиҳаи нави барномаи грантии Иттиҳоди Аврупо дар соҳаи таҳсилоти касбӣ-техникӣ баррасӣ шуд
ПЕШГИРИИ ОВОРАГАРДИИ НОБОЛИҒОН. Бо ин мақсад дар шаҳри Бохтар санҷиши шабона гузаронида шуд
ОГОҲИИ АГЕНТИИ ОБУҲАВОШИНОСӢ. Пагоҳ дар Тоҷикистон ҳавои номусоид пешгӯӣ мешавад
Агентии «Тоҷикстандарт»: «Ҳангоми харид ва истифодаи маҳсулоти консервашуда бо диққат бошед!»
